काठमाडौं । अमेरिकासँग पाकिस्तानको निकटता निरन्तर बढ्दै गएको छ । केही समयअघि अमेरिकाले पाकिस्तानलाई ४५ करोड डलर आर्थिक सहयोग गरेको थियो, जसमा भारतले आपत्ति जनाएको थियो । त्यस पछि हालै पाकिस्तानका राजदूतले पीओकेलाई आजाद कश्मीर भनेर सम्बोधन गरे। अहिले पाकिस्तानी सेनासँग संयुक्त अभ्यासका लागि अमेरिकी तटरक्षक गार्डका दुई जहाज कराँची बन्दरगाह पुगेका छन् ।

अमेरिकी नौसेनाको केन्द्रीय कमाण्डले यसबारे पाकिस्तानमा पुगेका यी दुई जहाजले संयुक्त सैन्य अभ्यास मात्र नभई अमेरिका र पाकिस्तानबीच प्राविधिक सूचना पनि साझा गर्ने बताएको छ । विज्ञप्तिमा थप भनिएको छ कि कराचीमा आइपुगेका दुबै नौसेना जहाजहरू मध्य पूर्वमा समुद्री स्थिरता र सुरक्षाका लागि जिम्मेवार अमेरिकी पाँचौं फ्लीटको हिस्सा हुन्।

अमेरिकी नौसेनाको पाँचौं फ्लीट मध्यपूर्वमा अमेरिकाको उपस्थितिको लागि धेरै महत्त्वपूर्ण छ। यो जहाजमार्फत अरब खाडी, ओमानको खाडी, रेड सी र हिन्द महासागरका केही भागको पनि निगरानी गरिन्छ। पानीको यो क्षेत्र २५ लाख वर्ग माइलमा फैलिएको छ ।

दक्षिण पश्चिम एसियामा तैनाथ अमेरिकी कोस्ट गार्ड क्याप्टेन एरिक हेल्गेनले यसबारे भनेका छन्, ‘हामी निकै उत्सुक छौं ।’ उनले यो भ्रमणले पाकिस्तानी नौसेना र अमेरिकी पाँचौं फ्लीटबीचको घनिष्ठ सम्बन्धलाई प्रमाणित गरेको बताए। कोस्ट गार्ड क्याप्टेनले थप भने कि पछिल्ला केही वर्षहरूमा ठूलो संख्यामा अमेरिकी नौसेनाका जहाजहरू पाकिस्तान पुगेका छन्, जसले अमेरिका र पाकिस्तानबीचको सम्बन्धलाई बलियो देखाउँछ।

कराची पुगेपछि अमेरिकी कोस्ट गार्डका सदस्यहरूले पाकिस्तानी नौसेनाका अधिकारीहरूलाई भेटे। सो क्रममा सामुद्रिक सुरक्षाका विषयमा पनि छलफल भएको थियो । यसबाहेक अमेरिकी नौसेनाका पाहुनाहरूले पाकिस्तानी नौसेनाका कर्मचारीहरूसँग भलिबल र फुटबल पनि खेलेका थिए। यसै क्रममा अमेरिकी कोस्ट गार्डको टोली कायदे-ए-आजम (मोहम्मद अली जिन्ना) को समाधिमा श्रद्धाञ्जली अर्पण गर्न पुग्यो।

अमेरिका र पाकिस्तानको नौसैनिक सेनाबीचको घनिष्ठ समन्वय नै पाकिस्तान कम्बाइन्ड मेरिटाइम फोर्स (सीएमएफ) को सदस्य हुनुको कारण हो। तपाईलाई भनौं कि ३४ देशहरू सीएमएफका सदस्य छन्, जसमा अमेरिकी पाँचौं फ्लीट पनि छ जसको मुख्यालय बहराइनमा छ। अमेरिकी नौसेनाका भाइस एडमिरल ३४ देशहरू मिलेर बनेको सीएमएफको जिम्मेवारीमा छन्।

पछिल्ला केही दिनमा धेरै यस्ता घटनाहरु घटेका छन् जसमा अमेरिका र पाकिस्तानी सम्बन्धमा मिठास बढ्दै गएको देखिएको छ ।अमेरिकासँगको सम्बन्ध पाकिस्तानमा इमरान खानको शासनकालमा कहिल्यै राम्रो भएन तर शाहबाजले पाकिस्तानमा सत्ता हातमा लिएपछि दुई देशबीचको सम्बन्धको बलियो ग्राफ उकालो लागिरहेको छ । विश्लेषकहरूका अनुसार रुसका विषयमा भारतलाई दबाब दिन अमेरिकाले पाकिस्तानसँग निकटता बढाएको छ । यसका साथै पाकिस्तान चीनको कोर्टमा पूर्णरुपमा नजाओस् भन्ने अमेरिकाको चिन्ता पनि छ ।

अमेरिकाले केही समयअघि पाकिस्तानलाई ४५ करोड डलरको आर्थिक सहायता दिएको थियो । अमेरिकाको तर्फबाट यो सहयोग एफ–१६ फाइटर फ्लीटको मर्मतसम्भारका लागि दिइएको भनिएको थियो, किनभने कसैलाई हतियार बेचियो भने थप मर्मतका लागि सहयोग गर्नुपर्छ भन्ने अमेरिकाको नीति छ । तर, भारतले यो सहयोगप्रति कडा आपत्ति जनाएको छ ।

विदेश मन्त्री एस जयशंकरले कडा स्वरमा भने कि तपाई कसलाई मूर्ख बनाउदै हुनुहुन्छ। पाकिस्तानले यो पैसा कसका लागि र कहाँ खर्च गर्छ, सारा विश्वलाई थाहा छ । अर्कोतर्फ अमेरिकाले पनि यस विषयमा स्पष्ट पार्ने प्रयास गरेको छ र अमेरिकाले दुवै देशसँगको सम्बन्धलाई फरक नजरले हेरेको बताएको छ ।

अमेरिकाको यो आर्थिक सहयोगमा भारतको आपत्ति पनि शान्त हुन सकेको थिएन कि इस्लामावादमा अमेरिकी राजदूत डोनाल्ड ब्लमको पीओके क्षेत्रको भ्रमणलाई लिएर फेरि विवाद चर्कियो। वास्तवमा, डोनाल्ड ब्लमको पीओके भ्रमणको बारेमा जानकारी दिँदै, पाकिस्तानमा अमेरिकी दूतावासले पीओकेलाई आजाद कश्मीर भनेर सम्बोधन गर्‍यो। जबकि भारतले लगातार पीओके आफ्नो हिस्सा भएको भन्दै आएको छ ।