काठमाडौं । रुसले युक्रेनको राजधानी किभ र अन्य सहरहरूमा बिजुली र पानी आपूर्ति अवरुद्ध गर्दै युक्रेनका पावर स्टेशनहरूलाई फेरि निशाना बनाएको छ।

बिहान कीभमा धेरै विस्फोटहरू सुनिएको थियो, र चाँडै नै निप्रो नदी नजिकैको पावर स्टेशनको वरिपरि धुवाँको मुस्लो उठ्न थाल्यो। कीभको पश्चिममा रहेको झिटोमिरमा बिजुली र पानी आपूर्ति कटौती गरिएको छ।

यसअघि रुसले राजधानी किभलगायत धेरै ठाउँमा कामिकाजी ड्रोन विस्फोट गराएको थियो । कामिकाजी ड्रोन इरानले बनाएको मानिन्छ। ड्रोन हमलामा आठ जनाको मृत्यु भएको छ । यी मानिसहरू कीभ र सुमीका बासिन्दा थिए।

ड्रोन आक्रमणमा धेरै महत्त्वपूर्ण पूर्वाधारमा पनि क्षति पुगेको छ, जसका कारण सयौं सहर र गाउँहरू बिजुलीविहीन छन्।

हालैका दिनहरूमा, रुसले युक्रेनको पावर स्टेशनहरूमा व्यवस्थित रूपमा आक्रमण गरेको छ। जाडोअघि नै यस्ता आक्रमणका कारण मानिसहरु निकै त्रसित छन् ।

राष्ट्रपति कार्यालयका उपप्रमुख किर्लो टिमोशेन्कोले राति माइकोलाइभ सहरको एक आवासीय भवनमा एस-३०० एन्टि-एयरक्राफ्ट मिसाइल प्रहार भएको र एक जनाको मृत्यु भएको बताए। आक्रमणमा सहरको फूल बजार पनि ध्वस्त भएको छ ।