काठमाडौं । च्यारिटीमा १० करोड रुपैयाँ दान गरेकी एक महिला चर्चामा छिन् । एक अन्तर्वार्तामा ती महिलाले आफ्नो आमाबुवा वा छोरीको लागि केही नछोडेको बताएकी छन् । ऋणमा डुबेकी छोरीलाई सहयोग गर्नुको सट्टा उनले आफ्नो सबै सम्पत्ति बेचेर पाएको पैसा दान गरिन् । अब यो अन्तर्वार्ता बाहिर आएपछि सामाजिक सञ्जालमा महिलाको आलोचना सुरु भएको छ । कुरा चीनको हो ।

साउथ चाइना मर्निङ पोस्टका अनुसार एक भ्लगरले सांघाईको सडकमा हिँडिरहेकी एक महिलाको अन्तर्वार्ता लिएका थिए। उक्त अन्तर्वार्तामा महिलाले सन् २०१९ मा बुद्ध धर्म ग्रहण गरि भिक्षु बनेको बताइन् । यस क्रममा महिलाले आफ्नो सबै पैसा दान गरिन् । उनले घर, कार बेचिन् र त्यसबाट जति पैसा पाइन् सबै दान दिइन् ।

ती महिलाले आफूले करिब ५.८८ मिलियन युआन (१० करोड ६९ लाख रुपैयाँभन्दा बढी) च्यारिटीमा दान गरेको बताइन् । त्यतिबेला उनकी छोरीले विश्वविद्यालयको शुल्क तिर्न संघर्ष गरिरहेकी थिइन् । उनीमाथि शैक्षिक ऋण थियो । तर छोरीलाई आर्थिक सहयोग गर्नुको सट्टा अरुलाई ठूलो रकम दिइन् । उनले बाबुआमा र छोरीको लागि केही छोडिनन्।

महिलाले भनिन् – आमाबुवाले मेरो निर्णयलाई समर्थन गरे पनि छोरीले मेरो निर्णय बुझिनन् । आमाबाबुले सामान्यतया उज्यालो पक्षबाट चीजहरू देख्छन्। मैले मेरो पैसा दान गरेको छु भन्ने बुझ्छन्। यो मेरो कमाएको पैसा थियो र यो मेरो विवेकमा थियो।

महिलाको यो भिडियो चिनियाँ सामाजिक सञ्जालमा भाइरल भएको छ । यो वेइबो मा २२० मिलियन भन्दा बढी पटक हेरिएको छ। यसमा हजारौं प्रयोगकर्ताले विभिन्न किसिमका प्रतिक्रिया दिएका छन् । धेरैले महिलाको आलोचना पनि गरेका छन् ।

एक प्रयोगकर्ताले भने- महिलाले आफ्नी छोरीलाई सहयोग गर्नुपर्थ्यो। अर्का एक प्रयोगकर्ताले लेखेका छन्, ‘यदि छोरीको लागि एक रुपैयाँ पनि छोड्न चाहनुहुन्न भने किन जन्म दिनुभयो ? अर्का एकजनाले भने– महिलाहरु आफ्नो जिम्मेवारीबाट भागिरहेका छन् । त्यही क्रममा अर्का प्रयोगकर्ताले भने– धेरै स्वार्थी स्वभाव ।

तर, महिलाको समर्थनमा धेरै मानिसहरु पनि देखा परेका छन् । एक प्रयोगकर्ताले भने- उनले छोरीलाई हुर्काइन्, पढाइन्, अब आफ्नो पैसाले जे चाहन्छिन् गर्न सक्छिन् । यसमा कसैले आपत्ति गर्नु हुदैन । अर्कोले भने– महिला संन्यासको बाटोमा छिन् ।