काठमाडौं । नेपालमा एक चिनियाँ फुड ब्लगरको हत्याको घटना बाहिर आएको छ । एक चिनियाँ ब्लगरले नेपालको बजारमा लाइभ स्ट्रिमिङ गरिरहेका थिए, त्यही क्रममा उनका एक प्रतिद्वन्द्वीले उनको हत्या गरेका थिए । ब्लगरलाई सार्वजनिक रूपमा आक्रमण गरिएको थियो।

उक्त घटनामा फुड ब्लगरका अर्का साथी घाइते भएका थिए । प्रारम्भिक अनुसन्धानमा चिनियाँ ब्लगरको हत्या गर्ने व्यक्तिले उनीसँग ईर्ष्या गर्ने र उनको भिडियोलाई लिएर यसअघि पनि दुईबीच तनाव भएको खुलेको छ । यसबाहेक पैसाको लेनदेनलाई लिएर पनि दुईबीच विवाद भएको थियो ।

चिनियाँ फूड ब्लगर गान सुजियोङ सामाजिक सञ्जालमा ‘फ्याटी गोज टु अफ्रिका’ नामले लोकप्रिय छन्। उनका ५० लाख फलोअर्स छन् । नेपालको राजधानी काठमाडौंको इन्द्रचोकमा गत डिसेम्बर ४ मा गानमाथि आक्रमण भएको थियो ।

यस मामिलामा प्रहरीले आरोपी चिनियाँ नागरिक ३७ वर्षीय फेङ झेङयुङलाई पक्राउ गरेको छ । यस घटनामा गानको साथी ३२ वर्षीय ली चुजान पनि घाइते भएका छन् । यसअघि पनि दुई पक्षबीच झडप भएको प्रहरीले जनाएको छ ।

प्रारम्भिक रिपोर्टका अनुसार आरोपी फेङ नेपालमै बस्छन् । उनी सामाजिक सञ्जालमा आयुन नामले चर्चित छन् । फेंगको गानसँग पैसाको लेनदेन र केही पहिलेका भिडियोहरूका कारण विवाद थियो । फेंग गानको ईर्ष्या पनि गर्थे।

२० वर्षका गानले आफ्ना फ्यानलाई संसारभरका व्यंजन र परिकारको बारेमा बताउँथे, यही क्रममा उनले काठमाडौंमा सुटिङ गरिरहेका थिए । डिसेम्बर ४ मा घटना हुँदा गान काठमाडौंको बजारबाट हिँड्दै पसलेसँग लगातार कुरा गरिरहेका थिए । अचानक चर्को आवाज सुनियो र उनको फोन अचानक भुइँमा खस्यो । अर्को भिडियोमा गानको अनुहार रगतले भिजेको देखिन्छ ।

गानको छाती र पेटमा धारिलो बस्तुले प्रहार गरिएको थियो, त्यसपछि उनलाई राष्ट्रिय ट्रमा सेन्टरमा भर्ना गरिएको थियो । डाक्टरहरूले उनको ज्यान जोगाउन धेरै प्रयास गरे तर भोलिपल्ट उनको मृत्यु भयो। यस घटनामा गानको साथी ली चुजानलाई पनि धारिलो हतियारले प्रहार गरिएको थियो, उनी पनि आक्रमणमा नराम्ररी घाइते भए पनि डाक्टरहरूले उनको ज्यान बचाए ।