काठमाडौं । शाहरुख खान र दीपिका पादुकोणको फिल्म ‘पठान’ रिलिज हुनुअघि ‘मल्टिप्लेक्स एसोसिएसन अफ गुजरात’का अध्यक्ष मनु पटेलले मुख्यमन्त्री भूपेन्द्र पटेल र गृहमन्त्री हर्ष सांघवीलाई पत्र लेखेर सुरक्षा सहयोग मागेका छन् ।

फिल्म २५ जनवरीमा रिलिज हुँदैछ । मल्टिप्लेक्स संघको पत्रमा भनिएको छ, ‘थिएटरमा देखाइने चलचित्र पहिले सेन्सर बोर्डमा जान्छ र त्यसपछि मात्रै रिलिज हुन्छ ।’ उनले भने, “रङ्गमञ्च एउटा व्यवसाय हो, व्यवसाय गर्ने अधिकार उनीहरुको छ, त्यसैले यो विषयमा विचार गरी उचित सहयोग गर्नुपर्छ।”

पत्रमा यो पनि भनिएको छ, “विगत २० दिनमा मल्टिप्लेक्स मालिकहरूलाई प्रत्यक्ष वा अप्रत्यक्ष रूपमा धम्की दिइँदै छ, त्यसैले उनीहरूलाई सुरक्षा दिनुपर्छ। यदि कसैलाई फिल्ममा कुनै समस्या छ भने उनीहरूले भारत सरकार वा अदालतमा जान सक्छन्।”

यसअघि बजरंग दलले अहमदाबादमा यो फिल्मको पोस्टर च्यातेको थियो । यो अवस्थालाई ध्यानमा राख्दै गुजरातको मल्टिप्लेक्स संघले यो पत्र लेखेको हो ।

फिल्मको ‘बेशरम रंग’ गीतलाई लिएर यसअघि नै विवाद भएको थियो । यस गीतमा अभिनेत्रीको कपडाको रंगलाई लिएर हिन्दू संगठनले आपत्ति जनाएका छन् । भाजपाका केही नेताहरूले यो फिल्मलाई प्रतिबन्ध लगाउन पनि माग गरेका छन् ।