काठमाडौँ। नेपाल उद्योग वाणिज्य महासंघ(एफएनसीसीआई)को नयाँ कार्यसमिति चयनका लागि आज (बुधबार) मतदान सुरु भएको छ। मतदान काठमाडौँको कमलादीस्थित नेपाल प्रज्ञा प्रतिष्ठानमा बिहान ८ बजेदेखि अपरान्ह ४ बजेसम्म हुने भएको छ।

एफएनसीसीआईको वरिष्ठ उपाध्यक्षका लागि उमेशलाल श्रेष्ठ, रामचन्द्र संघई र अञ्जन श्रेष्ठबीच कडा प्रतिस्पर्धा हुँदैछ। यी तीन उम्मेद्वारले जिल्ला तथा नगर, वस्तुगत र एशोसिएसटतर्फ पनि अलग अलग टोली बनाएका छन्।

महासंघको कार्यसमिति सदस्यमा चार जना सर्वसम्मत निर्वाचित भइसकेका छन्। यस हिसाबले अब एक वरिष्ठ उपाध्यक्ष, तीन उपाध्यक्ष र ५९ जना कार्यसमिति सदस्य मतदानबाट चयन हुनेछन्।

कार्यसमिति सदस्यमा लुम्बिनी प्रदेशबाट जम्शेर मिया, द्विराष्ट्रिय उद्योग वाणिज्य संघको तर्फबाट सुनिल केसी, संस्थापक सदस्यको तर्फबाट भीष्मप्रसाद न्यौपाने र सुदूरपश्चिम प्रदेशको तर्फबाट जंगबहादुर मल्ल सर्वसम्मत भइसकेका छन्।

महासंघको विधान अनुसार हाल वरिष्ठ उपाध्यक्ष रहेका चन्द्रप्रसाद ढकाल ३० चैतदेखि स्वतः अध्यक्ष बन्नेछन्।