काठमाडौं । दक्षिण अफ्रिकी फास्ट बलर शबनिम इस्माइलले महिला क्रिकेटमा इतिहास रचेकी छिन् । उनी बलिङ गर्दा १३० किलोमिटर प्रतिघण्टाको गति पार गर्ने पहिलो महिला बलर बनेकी छिन् । इस्माइलले मंगलबार दिल्लीमा यो ऐतिहासिक उपलब्धि हासिल गरेकी हुन् ।

इस्माइलले मुम्बई इन्डियन्स र दिल्ली क्यापिटल्सबीचको वुमन्स प्रिमियर लिग २०२४ को खेलमा १३२.१ किलोमिटर प्रतिघण्टाको गतिमा बल फालिन्, जुन प्रसारणमा स्पीड-गनले रेकर्ड गरेको थियो। इस्माइल डब्ल्यूपीएलमा मुम्बईको टोलीबाट खेल्दैछिन्।

खेलको तेस्रो ओभरमा शबनिमले गरेको दोस्रो बल अहिले महिला क्रिकेटको रेकर्ड बुकमा दर्ता भएको छ । इस्माइलले क्यापिटल्सकी कप्तान मेग ल्यानिलाई यो बल फ्याँकेकी थिइन् । ल्यानिङले यो बल नखेलेर छाडिदिइन् र उनको अगाडिको प्याडमा ठोक्कियो। त्यसपछि मुम्बईले एलबीडब्लुको लागि अपील गर्यो तर अम्पायरले दिएनन् ।

पुरुष क्रिकेटमा कुनै पनि फर्म्याटमा सबैभन्दा छिटो बल फाल्ने कीर्तिमान पाकिस्तान शोएब अख्तरको नाममा छ । अख्तरले २००३ को विश्वकपमा इंग्ल्यान्ड विरुद्ध दक्षिण अफ्रिकाको न्युल्यान्ड्समा भएको खेलमा १६१.३ किलोमिटर प्रतिघण्टाको गतिमा बल गरेका थिए । यो अहिलेसम्म पनि क्रिकेट इतिहासमा रेकर्ड गरिएको सबैभन्दा छिटो बल हो। उनले यो बल इङ्ल्यान्डका ब्याट्सम्यान निक नाइटलाई फालेका थिए ।