काठमाडौं । पूर्वप्रधानमन्त्री तथा नेपाली कम्युनिस्ट पार्टीका वरिष्ठ नेता झलनाथ खनालले संयुक्त राज्य अमेरिका र इजरायलले फेब्रुअरी २८, २०२६ मा इरानमाथि गरेको संयुक्त सैनिक आक्रमणप्रति गम्भीर ध्यानाकर्षण भएको जनाउँदै कडा शब्दमा निन्दा तथा भत्र्सना गरेका छन् ।

आइतबार एक प्रेस विज्ञप्ति जारी गर्दै खनालले उक्त आक्रमणका क्रममा इरानका सर्वोच्च नेता आयतोल्लाह अली खामेनी तथा अन्य उच्च पदस्थ अधिकारीहरूको हत्या भएको घटनालाई मानवअधिकारको ठाडो उल्लंघन, मानवीय विवेकको परित्याग र अन्तर्राष्ट्रिय कानुनको खुला उल्लंघनका रूपमा व्याख्या गरिएको छ ।

एक सार्वभौम राष्ट्रका सर्वोच्च नेताको हत्या गर्नु तथा अन्तर्राष्ट्रिय सम्बन्धका आधारभूत सिद्धान्त र संयुक्त राष्ट्र संघको बडापत्रको उल्लंघन गर्दै गरिएको उक्त आक्रमणलाई विज्ञप्तिमा ‘नग्न र जङ्गली’ कार्यको संज्ञा दिइएको छ ।

अमेरिकी राष्ट्रपति र इजरायली प्रधानमन्त्रीको प्रत्यक्ष निर्देशनमा भएको दाबी गरिएको यस संयुक्त कारबाहीले विश्वलाई ‘जङ्गली राज’तर्फ धकेल्ने दुस्साहस गरेको उल्लेख गर्दै, यसले विशेषगरी साना तथा विकासोन्मुख राष्ट्रहरूको स्वतन्त्रता, स्वाभिमान र सार्वभौमसत्तामाथि गम्भीर खतरा उत्पन्न गरेको चेतावनी दिइएको छ ।

विज्ञप्तिमा साम्राज्यवादी प्रवृत्तिका यस्ता आक्रमणविरुद्ध विश्व शक्तिहरू, मझौला तथा साना राष्ट्रहरू मौन बस्न नहुने उल्लेख गर्दै सम्पूर्ण अन्तर्राष्ट्रिय समुदायलाई एकताबद्ध भई दादागिरीपूर्ण र गैरकानुनी हिंसात्मक कदमको प्रतिवाद गर्न आह्वान गरिएको छ ।