काठमाडौं । नेपाल सरकारले इरानी नागरिकलाई अनअराइभल भिसा नदिने भएको छ।

अध्यागमन विभागले नेपाल भ्रमण गर्न चाहने इरानी नागरिकलाई अनअराइभल भिसा उपलब्ध नगराउने निर्णय गरेको हो।

अध्यागमन विभागका प्रवक्ता टिकाराम ढकालका अनुसार यससँगै सरकारी र कूटनैतीक राहदानी बाहेकका नागरिकले अबदेखि विदेशस्थित नेपाली दूतावासबाट भिसा लिए मात्रै नेपाल प्रवेश गर्न मिल्ने भएको छ।

यससँगै नेपालमा अनअराइभल भिसा प्राप्त नहुने मुलुकको संख्या १३ पुगेको छ। यसअघि नाइजेरिया, घाना, जिम्बावे, स्वाजिल्यान्ड, सोमालिया, लाइबेरिया, इथोपिया, इराक, प्यालेस्टाइन, अफगानिस्तान र सिरियाका नागरिकले अनअराइभल भिसा पाउँदैनन्।

नेपालले शरणार्थीको पहिचान स्वरुप ट्राभल डकुमेन्ट बोक्ने व्यक्तिहरूका लागि पनि प्रवेशको नियममा कडाइ गरिएको छ।