काठमाडाैं।चिनियाँ अटो निर्माता डोङफेङले दक्षिण अफ्रिकामा अहिलेसम्मकै सबैभन्दा सस्तो पूर्ण इलेक्ट्रिक एसयूभी ‘नामी ०६ ई१’ सार्वजनिक गरेको छ ।

दक्षिण अफ्रिकामा ‘भिगो’ नामले समेत चिनिने यो मोडल ४ लाख ९९ हजार र्‍यान्डको सुरुवाती मूल्यमा उपलब्ध छ, जुन बजारमा रहेको अर्को प्रतिस्पर्धी जिली E5/EX5 भन्दा करिब २ लाख र्‍यान्डले सस्तो छ ।

डोङफेङले यसअघि नै बक्स ह्याचब्याक र ००७ प्रिमियम सेडान बजारमा ल्याइसकेको भए पनि यो एसयूभी सार्वजनिक भएसँगै सर्वसाधारणले सहजै किन्न सक्ने बजेटमैत्री विकल्प तयार भएको छ ।

यो नयाँ विद्युतीय एसयूभी दुईवटा भेरियन्टमा उपलब्ध छ, जसमा १२० किलोवाट क्षमताको मोटर र २३० न्युटन मिटर टर्क जडान गरिएको छ । यसले शून्यदेखि १०० किलोमिटर प्रतिघण्टाको गति मात्र ७.८ सेकेन्डमा तय गर्न सक्छ ।

सुरुवाती मोडलमा ४४.९४ किलोवाट प्रतिघण्टा क्षमताको ब्याट्री रहेको छ जसले विश्वव्यापी मापदण्ड अनुसार एक पटकको चार्जमा ३०० किलोमिटरसम्मको रेन्ज दिन्छ भने ५ लाख ७९ हजार र्‍यान्ड मूल्य पर्ने उच्च स्पेसिफिकेसनको ‘ई३’ मोडलमा ५१.८७ किलोवाट प्रतिघण्टाको ठूलो ब्याट्री दिइएको छ, जसले ३५० किलोमिटरसम्मको रेन्ज उपलब्ध गराउँछ ।

ई३ मोडलमा १६७ किलोवाटको डीसी फास्ट चार्जिङ सपोर्ट रहेकाले यसलाई ३० देखि ८० प्रतिशतसम्म चार्ज गर्न मात्र १८ मिनेट लाग्छ । सुविधाका हिसाबले यो गाडी निकै सुसज्जित छ, जसमा १२.८ इन्चको इन्फोटेन्मेन्ट डिस्प्ले, ५० वाटको वायरलेस चार्जर, ६ वटा एयरब्याग, लेदरेट सिट र ५०० लिटरको बुट स्पेस समावेश गरिएको छ ।

कालो, सेतो, सिल्भर, सुन्तला र हरियो गरी पाँच आकर्षक रङमा उपलब्ध यो एसयूभीमा सुरक्षाका लागि हिल-स्टार्ट असिस्ट र टायर प्रेसर मोनिटरिङ जस्ता आधुनिक प्रणालीहरू पनि राखिएका छन् ।

चीनका चार ठूला सरकारी अटो कम्पनीमध्ये एक डोङफेङले निसानसँगको साझेदारीमा आफ्ना उत्पादनहरू विश्व बजारमा ल्याइरहेकाले यसको विश्वसनीयता थप मजबुत हुने देखिएको छ । दक्षिण अफ्रिकामा इन्धनको मूल्य बढिरहेको वर्तमान अवस्थामा यो मोडल किफायती र उत्कृष्ट विद्युतीय विकल्प बन्ने अपेक्षा गरिएको छ ।