काठमाडौं। चिनियाँ अटोमोबाइल जायन्ट डोङफेङ मोटरको एक सहायक कम्पनीले आफ्नो प्रिमियम विद्युतीय सवारी (ईभी) ब्रान्ड भोया अटोमोटिभमा हिस्सेदारी बढाउँदै कम्पनीमाथिको नियन्त्रण अझ बलियो बनाएको छ।

भोयाले सार्वजनिक गरेको आधिकारिक जानकारी अनुसार डोङफेङ मोटर (हङकङ) इन्टरनेशनलले सेकेन्डरी बजारमार्फत कम्पनीको २ करोड १ लाख ९० हजार H शेयर खरिद गरेको हो। यो ईभी निर्माता कम्पनीको कुल जारी शेयर पूँजीको करिब ०.५५ प्रतिशत हिस्सा हो।

यो नयाँ शेयर खरिद योजना कार्यान्वयनमा आएसँगै भोया अटोमोटिभमा डोङफेङ मोटर र यससँग सम्बन्धित निकायहरूको संयुक्त हिस्सेदारी बढेर ७०.०२ प्रतिशत पुगेको छ। हाल कम्पनीका नियन्त्रणकारी शेयरधनीहरूसँग २ अर्ब ४३ करोड ८० लाखभन्दा बढी घरेलु शेयर र करिब १३ करोड ८० लाख H शेयरको स्वामित्व रहेको छ।

डोङफेङले सन् २०२० को अन्त्यतिर घोषणा गरी सन् २०२१ मा औपचारिक रूपमा स्थापना गरेको भोया ब्रान्डले मुख्य रूपमा २ लाखदेखि ५ लाख युआन मूल्य वर्गका प्रिमियम सवारीसाधन उत्पादन गर्दै आएको छ।

डोङफेङले अगस्ट २०२५ मा भोयालाई ‘लिस्टिङ बाइ इन्ट्रोडक्सन’ प्रक्रियामार्फत हङकङ स्टक एक्सचेन्जमा सूचीकृत गर्ने घोषणा गरेको थियो, जसमा नयाँ शेयर जारी नगरी वा थप पूँजी संकलन नगरी पहिले नै जारी भइसकेका शेयर मात्र कारोबारका लागि उपलब्ध गराइन्छ।

आफ्नै कम्पनीको मूल्याङ्कन सीमितताका कारण डोङफेङले इक्विटी रिफाइनान्सिङ गर्न नसकेपछि यसको H-शेयर प्लेटफर्मको फाइनान्सिङ उपयोगिता कमजोर भएको थियो, जसका कारण डोङफेङले आफैंलाई निजीकरण गरी बजारबाट हटाउने निर्णय समेत गरेको थियो।

यसै रणनीतिक कदम अन्तर्गत भोया यसै वर्ष मार्च १९ मा स्टक कोड ०७४८९ अन्तर्गत हङकङ स्टक एक्सचेन्जमा आधिकारिक रूपमा सूचीकृत भएको हो।

व्यापारिक रूपमा बलियो बन्दै गएको भोयाले सन् २०२५ मा नाफा कमाउँदै १ अर्ब २ करोड युआन खुद आम्दानी गर्न सफल भएको छ। ब्रान्डको कुल आम्दानी सन् २०२३ को १२ अर्ब ७५ करोड युआनबाट नाटकीय रूपमा बढेर सन् २०२५ मा ३४ अर्ब ८६ करोड युआन पुगेको छ।

यही दुई वर्षको अवधिमा गाडीको बिक्री समेत ५० हजार २८५ युनिटबाट उल्लेख्य रूपमा वृद्धि भई १ लाख ५० हजार १६९ युनिट पुगेको छ।

बजारमा आफ्नो बलियो पकड कायम राख्दै यस वर्षको पहिलो चार महिनामा मात्रै भोयाले ४९ हजार ३८ वटा गाडी ग्राहकलाई हस्तान्तरण गरिसकेको छ, जुन अघिल्लो वर्षको सोही अवधिको तुलनामा ३६.०२ प्रतिशतको उत्साहजनक वृद्धि हो।