काठमाडौं। ऊर्जा, जलस्रोत तथा सिँचाइमन्त्री विराजभक्त श्रेष्ठले स्युचाटारस्थित नेपाल विद्युत् प्राधिकरणको विद्युत् प्रणाली तथा सञ्चालन विभागको आकस्मिक निरीक्षण गरेका छन्।

मन्त्री श्रेष्ठले शनिबार साँझ विभागको कार्यालय पुगेर त्यहाँको वस्तुस्थिति र कार्यप्रणालीबारे प्रत्यक्ष अवलोकन गरेका हुन्।

निरीक्षणका क्रममा मन्त्री श्रेष्ठले मुलुकको समग्र विद्युत् प्रणालीको वर्तमान सञ्चालन प्रक्रिया, राष्ट्रिय ग्रिडको विद्युत् आपूर्ति व्यवस्थापन र पछिल्लो समय छिमेकी मुलुकहरूसँग भइरहेको अन्तरदेशीय विद्युत् खरिद-बिक्रीको अवस्थाबारे विस्तृत जानकारी लिए।

उनले जनतालाई नियमित र गुणस्तरीय विद्युत् सेवा उपलब्ध गराउनुका साथै छिमेकी देशहरूसँगको व्यापारलाई थप प्रभावकारी बनाउन विभागले निर्वाह गरिरहेको भूमिकाका विषयमा समेत अधिकारीहरूसँग छलफल गरेका थिए।