काठमाडौं । जनता समाजवादी पार्टी (जसपा), नेपालले लुम्बिनी प्रदेश सरकारमा भण्डारीलाल अहिरलाई मन्त्री नियुक्त गरिएको प्रति आपत्ति प्रकट गरेको छ। पार्टीका प्रवक्ता मनिष कुमार सुमनले सोमबार एक प्रेस विज्ञप्ति जारी गर्दै नेकपा (एमाले) र नेपाली कांग्रेसको सत्ता गठबन्धनका मुख्यमन्त्री चेतनारायण आचार्यले चालेको उक्त कदम अनैतिक, स्वेच्छाचारी र अलोकतान्त्रिक भएको भन्दै कडा शब्दमा भर्त्सना गरेका छन्।

जसपा नेपालले सर्वोच्च अदालतको हालैको फैसलाले राजनीतिक जालझेलबाट खडा गरिएको ‘जसपा’ लाई अवैध ठहर गर्दै आफ्नै पार्टीलाई वैधानिकता प्रदान गरिसकेको स्मरण गराएको छ। अदालतको उक्त फैसलासँगै दल विभाजनको गैरकानुनी प्रपञ्च स्वतः खारेज भएको र सम्पूर्ण जनप्रतिनिधि तथा नेता-कार्यकर्ताहरू कानुनी रूपमा जसपा, नेपालकै मातहत र दलीय अनुशासनमा बाँधिएको विज्ञप्तिमा उल्लेख छ। कानुनी स्थितिको आधिकारिक जानकारी गराउँदागराउँदै पनि मुख्यमन्त्रीले न्यूनतम राजनीतिक नैतिकता र लोकतान्त्रिक मूल्य–मान्यताको ख्याल नगरी अहिरलाई मन्त्री पदको शपथ गराएको आरोप पार्टीले लगाएको छ।

यसरी मन्त्री नियुक्त गर्नु कानुनी राज्यको उपहास मात्र नभएर लोकतन्त्रमाथिको नाङ्गो प्रहार र बलमिच्याइँको पराकाष्ठा भएको जसपा नेपालको ठहर छ। मुख्यमन्त्रीको यो हर्कत अलोकतान्त्रिक, असंवैधानिक र राजनीतिक रूपमा अत्यन्तै निन्दनीय भएको विज्ञप्तिमा जनाइएको छ।

जसपा नेपालले मन्त्री नियुक्त गरिएका भण्डारीलाल अहिरलाई तत्काल मन्त्री पदबाट बर्खास्त गर्न माग गरेको छ। पार्टीले आफ्नो यस न्यायसंगत र कानुनी मागलाई नजरअन्दाज गरिएमा सम्मानित अदालतको मानहानी गर्ने तथा बलमिच्याइँमा उत्रिने लुम्बिनी प्रदेश प्रमुख, मुख्यमन्त्री र एमाले-कांग्रेस सत्ता गठबन्धनविरुद्ध सशक्त कानुनी प्रक्रियामा जान बाध्य हुने चेतावनी समेत दिएको छ।