काठमाडौं। टेलिटकले नेपाली बजारमा उत्कृष्ट कार्यसम्पादन, सहज प्रयोग अनुभव र आधुनिक प्रविधिसहितको पोको एम८ सिरिजका दुई नयाँ स्मार्टफोनहरू सार्वजनिक गरेको छ।

नेपाली उपभोक्तामाझ आधुनिक प्रविधिको पहुँच विस्तार गर्ने लक्ष्यका साथ कम्पनीले बजारमा ‘पोको एम८एस फाइभ-जी’ (POCO M8s 5G) र यसको उन्नत संस्करण ‘पोको एम८ प्रो फाइभ-जी’ (POCO M8 Pro 5G) भित्र्याएको हो।

यी दुवै स्मार्टफोनहरू पानीका छिटा र धुलोबाट सुरक्षित रहने आईपी वाटर तथा डस्ट रेसिस्टेन्स सुविधाका साथ उपलब्ध छन्। सार्वजनिक गरिएको पहिलो मोडल पोको एम८एस फाइभ-जीमा ७,००० एमएएच (mAh) क्षमताको अत्यन्त शक्तिशाली ब्याट्री जडान गरिएको छ, जसले प्रयोगकर्तालाई लामो समयसम्म निर्बाध रूपमा फोन चलाउने सुविधा दिन्छ।

यो फोनमा ३३ वाट टर्बो चार्जिङ र १८ वाट रिभर्स चार्जिङको विकल्प उपलब्ध छ। स्पष्ट र गुणस्तरीय फोटोग्राफीका लागि यसको पछाडि ५० मेगापिक्सेलको मुख्य क्यामेरा र अगाडि ८ मेगापिक्सेलको सेल्फी क्यामेरा राखिएको छ। यसमा १४४ हर्ज रिफ्रेस दरसहितको ६.९ इन्चको पूर्ण एचडी प्लस (FHD+) डिस्प्ले दिइएको छ, जसले दृश्यहरूलाई निकै सहज र आकर्षक बनाउँछ।

स्न्यापड्रागन ६एस जेन ३ प्रोसेसर, अष्ट-कोर सीपीयू र एड्रेनो जीपीयूद्वारा सञ्चालित यो फोन दैनिक प्रयोगका लागि निकै प्रभावकारी हुने कम्पनीले जनाएको छ। यसैगरी, एम८ सिरिजकै थप प्रिमियम र उन्नत संस्करणका रूपमा पोको एम८ प्रो फाइभ-जीलाई बजारमा उतारिएको छ।

यसमा १.५के रिजोल्युसन, १२० हर्ज रिफ्रेस दर र अधिकतम ३,२०० निट्ससम्मको उज्यालोपन (ब्राइटनेस) भएको ६.८३ इन्चको क्रिस्टलरेस एमोलेड (CrystalRes AMOLED) डिस्प्ले रहेको छ, जसले उत्कृष्ट दृश्य अनुभव प्रदान गर्दछ।

फोटोग्राफीका सौखिनहरूका लागि यसमा ५० मेगापिक्सेलको मुख्य क्यामेरा, ८ मेगापिक्सेलको अल्ट्रा-वाइड क्यामेरा र अगाडि ३२ मेगापिक्सेलको शक्तिशाली क्यामेरा समावेश छ। फोनमा ६,५०० एमएएच क्षमताको ब्याट्रीसँगै १०० वाटको द्रुत हाइपरचार्ज र २२.५ वाटको रिभर्स चार्जिङ सुविधा दिइएको छ।

४ न्यानोमिटर प्रविधिमा आधारित स्न्यापड्रागन ७एस जेन ४ प्रोसेसरले यसलाई २.७ गिगाहर्जसम्मको उच्च गति र उत्कृष्ट अष्ट-कोर कार्यसम्पादन प्रदान गर्छ। टेलिटकका कार्यकारी निर्देशक प्रतीक जालानका अनुसार, यी दुवै फोनले उत्कृष्ट कार्यसम्पादन, किफायती मूल्य र सहज फाइभ-जी अनुभवलाई एकैसाथ समेटेका छन्।

दैनिक आवश्यकतालाई बुझेर तयार पारिएका यी स्मार्टफोनहरूले प्रतिस्पर्धी मूल्यमा आधुनिक प्रविधि उपलब्ध गराउँदै उपभोक्तामाझ गुणस्तरीय प्रविधिको पहुँच विस्तार गर्ने पोकोको प्रतिबद्धतालाई थप बलियो बनाएका छन्।

मूल्यका हकमा, पोको एम८एस फाइभ-जी कालो र सेतो रङमा उपलब्ध छ, जसको ६ जीबी र्याम र १२८ जीबी स्टोरेज संस्करणको मूल्य ३७ हजार ९९९ रुपैयाँ तथा ८ जीबी र्याम र २५६ जीबी स्टोरेज संस्करणको मूल्य ४४ हजार ९९९ रुपैयाँ निर्धारण गरिएको छ।

त्यस्तै, पोको एम८ प्रो फाइभ-जीको ८ जीबी र्याम र २५६ जीबी स्टोरेज संस्करण कालो, हरियो र चाँदी (सिल्भर) रङमा उपलब्ध छ, जसको मूल्य ५६ हजार ९९९ रुपैयाँ तोकिएको छ।

उपभोक्ताहरूको सहजताका लागि पोकोले सबै मोडेलहरूमा १ वर्षको आधिकारिक ब्रान्ड वारेन्टीका साथै अधिकतम ९ महिनासम्मको बिना ब्याजको किस्ता (इएमआई) सुविधा समेत उपलब्ध गराएको छ र यी फोनहरू अब टेलिटकका आधिकारिक शोरुम, खुद्रा विक्रेता र अनलाइन प्लेटफर्म दराज (Daraz) मार्फत सजिलै खरिद गर्न सकिनेछ।