काठमाडौं । अर्जेन्टिनाका कप्तान लियोनेल मेस्सी आइतबार अमेरिकाको न्यु जर्सीस्थित मेटलाइफ स्टेडियममा हुने फिफा विश्वकप २०२६ को फाइनलमा स्पेनविरुद्ध मैदान उत्रँदा व्यक्तिगत पीडादायी सम्झनालाई ऐतिहासिक सफलतामा रूपान्तरण गर्ने अवसरको खोजीमा हुनेछन्।

मेस्सीका लागि यो फाइनल विश्व फुटबलको सबैभन्दा ठूलो उपाधिका लागि हुने प्रतिस्पर्धा मात्र होइन, सन् २०१६ को कोपा अमेरिका सेन्टेनारियोको फाइनलमा यही मैदानमा चिलीसँग पेनाल्टी सुटआउटमा भोगेको निराशाको स्मृतिसँग पनि जोडिएको छ। उक्त खेलमा निर्णायक पेनाल्टी चुकाएका मेस्सी भावुक बनेका थिए र पराजयपछि राष्ट्रिय टोलीबाट सन्यास लिने घोषणा गर्दै विश्व फुटबललाई स्तब्ध बनाएका थिए।

त्यतिबेला उनले भनेका थिए, “मेरो लागि राष्ट्रिय टोलीसँगको यात्रा सकियो। मैले धेरै प्रयास गरेँ।” तर उनको निर्णयपछि अर्जेन्टिनाभर समर्थक, पूर्वखेलाडी र फुटबलकर्मीहरूले सन्यास फिर्ता लिन आग्रह गर्दै व्यापक अभियान चलाएका थिए। अन्ततः मेस्सीले आफ्नो निर्णय पुनर्विचार गरे र राष्ट्रिय टोलीमा फर्किए।

त्यही समयमा १५ वर्षीय किशोर एन्जो फर्नान्डेज पनि सामाजिक सञ्जालमार्फत मेस्सीलाई भावुक सन्देश लेख्ने समर्थकमध्ये एक थिए। उनले, “तपाईं जे निर्णय गर्न चाहनुहुन्छ गर्नुस्, तर कृपया राष्ट्रिय टोली नछोड्नुहोस्। रमाइलोका लागि भए पनि खेलिरहनुहोस्,” भन्दै आग्रह गरेका थिए।

एक दशकपछि परिस्थिति पूर्ण रूपमा बदलिएको छ। फर्नान्डेज अहिले अर्जेन्टिनाका प्रमुख मिडफिल्डरका रूपमा मेस्सीसँगै मैदानमा उत्रनेछन् र टोलीलाई लगातार दोस्रो विश्वकप उपाधि दिलाउने अभियानको महत्वपूर्ण सदस्य बनेका छन्।

प्रशिक्षक लियोनेल स्कालोनीको नेतृत्वमा रहेको अर्जेन्टिनाले सेमिफाइनलमा इंग्ल्यान्डविरुद्ध २–१ को रोमाञ्चक पुनरागमन जित निकाल्दै फाइनल यात्रा तय गरेको थियो। उक्त खेलमा एन्जो फर्नान्डेजले बराबरी गोल गरेका थिए भने लाउटारो मार्टिनेजले इन्जुरी समयमा विजयी गोल गर्दै टोलीलाई फाइनल पुर्‍याएका थिए।

अर्जेन्टिना प्रतियोगितामा लगातार १४ खेल जित्दै दक्षिण अमेरिकी टोलीको सबैभन्दा लामो लगातार जितको कीर्तिमान बराबरी गर्ने क्रममा छ। साथै टोली सन् १९६२ मा ब्राजिलपछि लगातार दुई विश्वकप जित्ने दोस्रो राष्ट्र बन्ने लक्ष्यसहित मैदानमा उत्रनेछ।

यता युरोपियन च्याम्पियन स्पेन पनि उत्कृष्ट लयमा रहेको छ। प्रशिक्षक लुइस दे ला फुएन्तेको टोलीले प्रतियोगिताभर केवल एक गोल मात्र व्यहोरेको छ र पुरुष विश्वकप इतिहासमा एउटै संस्करणमा सर्वाधिक ६ क्लिनसिट राख्ने पहिलो टोली बनेको छ।

स्पेनले समूह चरणको पहिलो खेलमा केप भर्डेविरुद्ध गोलरहित बराबरी खेलेपछि लगातार छ खेल जित्दै अस्ट्रिया, पोर्चुगल, बेल्जियम र फ्रान्सलाई पराजित गर्दै फाइनलमा स्थान बनाएको हो। टोली ३७ खेलदेखि अपराजित रहँदै सन् २०१० पछि दोस्रो विश्वकप उपाधिको खोजीमा छ।

हेड–टु–हेड तथ्यांक पनि निकै प्रतिस्पर्धात्मक छ। अर्जेन्टिना र स्पेनबीच हालसम्म १४ खेल भएका छन्, जसमा दुवैले समान ६–६ खेल जितेका छन् भने दुई खेल बराबरीमा टुंगिएका छन्। विश्वकपमा उनीहरूको एकमात्र भेट सन् १९६६ मा भएको थियो, जहाँ अर्जेन्टिनाले २–१ को जित निकालेको थियो। पछिल्लो भेट भने सन् २०१८ को मैत्रीपूर्ण खेलमा भएको थियो, जसमा स्पेनले अर्जेन्टिनालाई ६–१ ले पराजित गरेको थियो।

यसपटक भने सम्पूर्ण फुटबल जगतको नजर फेरि एकपटक मेस्सीमाथि केन्द्रित हुनेछ। १० वर्षअघि यही मेटलाइफ स्टेडियमबाट आँसु झार्दै बाहिरिएका उनीसँग अब त्यही मैदानलाई आफ्नो करियरकै अर्को अविस्मरणीय उपलब्धिको साक्षी बनाउने अवसर छ। यदि अर्जेन्टिनाले उपाधि जित्न सफल भयो भने मेस्सीले व्यक्तिगत रूपमा विगतको पीडालाई इतिहासकै सबैभन्दा मधुर सम्झनामध्ये एकमा बदल्नेछन् भने अर्जेन्टिनाले पनि विश्व फुटबलमा आफ्नो स्वर्णिम युगलाई थप मजबुत बनाउनेछ।