काठमाडौं। आईसीसी क्रिकेट विश्वकप लिग-२ अन्तर्गतको खेलमा घरेलु टोली नेदरल्यान्ड्ससँग ६ विकेटले पराजित भएसँगै नेपालको शीर्ष चारभित्र पर्दै सोझै विश्वकप छनोटमा पुग्ने सम्भावना थप कमजोर बनेको छ। लगातार दुई खेलमा समान १ सय ५७ रनमै समेटिएको नेपाली टोली ब्याटिङ र बलिङ दुवै क्षेत्रमा निस्तेज देखिएको हो।

बिहीबार सम्पन्न खेलमा टस हारेर पहिले ब्याटिङको निम्तो पाएको नेपालले ४४.४ ओभरमा आफ्ना सबै विकेट गुमाउँदै १ सय ५७ रन मात्र बनाउन सक्यो। टोलीका लागि कप्तान रोहितकुमार पौडेलले सर्वाधिक ३१ रन बनाए भने दीपेन्द्रसिंह ऐरीले ३० र गुल्सनकुमार झाले २० रन जोडे।

यस्तै करण केसीले १८, आसिफ शेखले १६ र सोमपाल कामीले १५ रनको योगदान दिए पनि कुनै पनि ब्याटरले ठूलो र जिम्मेवारीपूर्ण इनिङ्स खेल्न सकेनन्। सुरुआत पाएर पनि त्यसलाई ठूलो स्कोरमा बदल्न नसक्दा र मध्यक्रम लगातार धराशायी बन्दा नेपालले फराकिलो योगफल तयार पार्न सकेन।

जवाफी ब्याटिङमा उत्रिएको नेदरल्यान्ड्सले १ सय ५८ रनको लक्ष्य ४४.१ ओभरमा ४ विकेट गुमाएर सहजै भेट्टायो। कप्तान स्कट इडवार्डसले सम्हालिएको इनिङ्स खेल्दै टोलीको जित सुनिश्चित गरे। नेपाली बलरहरूले सुरुआती सफलता दिलाउन नसक्दा र फिल्डिङमा समेत चुकेपछि डच टोलीले पुरै खेलभरि आफ्नो दबाब कायम राखेको थियो।

नेपाल यसअघि मंगलबार भएको खेलमा पनि नामिबियाविरुद्ध १ सय ५७ रनमै अलआउट हुँदै पराजित भएको थियो। उक्त खेलमा नामिबियाले १ सय ५८ रनको लक्ष्य ३७.४ ओभरमा २ विकेट गुमाएर पूरा गरेको थियो, जसमा कप्तान जान फ्राइलिंकले अविजित ७८ र माइकल भान लिंगनले ५१ रन बनाएका थिए।

लगातारको कमजोर ब्याटिङका कारण नेपाल लिग-२ को अंक तालिकामा पछाडि पर्दै गएको छ। आठ टोली सहभागी प्रतियोगितामा नेपाल ३० खेलबाट २४ अंक जोड्दै पाँचौँ स्थानमा सीमित छ भने जित हासिल गरेको नेदरल्यान्ड्स २९ खेलबाट ३४ अंकका साथ तेस्रो स्थानमा उक्लिएको छ। यो हारसँगै नेपालको शीर्ष चारभित्र पर्ने यात्रा थप चुनौतीपूर्ण बनेको छ।