सुर्खेत। नेपालगञ्जबाट स्कुटरमा सवार भएर सुर्खेत फर्किरहेका एक युवकको यात्राकै क्रममा अचानक बेहोस भएपछि उपचारका लागि अस्पताल लगिएको थियो। तर चिकित्सकको प्रयासका बाबजुद उनको ज्यान जोगिन सकेन।

जिल्ला प्रहरी कार्यालय सुर्खेतका सूचना अधिकारी कविन्द्रसिंह बोहोराका अनुसार मृत्यु हुनेमा वीरेन्द्रनगर नगरपालिका–९ का २९ वर्षीय उत्सव जिसी रहेका छन्।

प्रहरीका अनुसार जिसी वीरेन्द्रनगर–९ कै २७ वर्षीय रोशन घिसिङले चलाएको स्कुटरमा नेपालगञ्जबाट सुर्खेततर्फ आउँदै थिए। स्कुटर वीरेन्द्रनगर नगरपालिका–४ स्थित हर्रे क्षेत्रमा पुग्दा जिसी अचानक बेहोस भएका थिए।

घटनापछि चालक घिसिङले तत्काल प्रहरीलाई जानकारी गराएका थिए। सूचना प्राप्त हुनासाथ प्रहरी टोली घटनास्थल पुगेर जिसीको उद्धार गरी उपचारका लागि कर्णाली प्रदेश अस्पताल पुर्‍याएको थियो।

अस्पतालमा उपचार सुरु गरिए पनि चिकित्सकले उनलाई बचाउन सकेनन्। उपचारकै क्रममा जिसीको मृत्यु भएको प्रहरीले जनाएको छ।

प्रहरीले घटनाबारे आवश्यक अनुसन्धान सुरु गरेको जनाएको छ। जिसी बेहोस हुनुको वास्तविक कारण पोस्टमार्टम रिपोर्ट र थप अनुसन्धानपछि खुल्ने प्रहरीको भनाइ छ।