राष्ट्रिय खेलकुद परिषद् (राखेप)ले शनिबार आयोजना गरेको कार्यक्रममा सदस्यसचिव रामचरित्र मेहता, नेपाल क्रिकेट संघ (क्यान)का सचिव पारस खड्कालगायतले नेपाली टोलीलाई बिदाइ गरेका हुन् ।

बिदाइ कार्यक्रममा सदस्यसचिव मेहताले नेपाली टोलीलाई प्रतियोगिताका लागि शुभकामना दिँदै राम्रो प्रदर्शनसहित पदकको आशा रहेको बताए ।

नेपाली टोलीले एसियाली खेलकुदको समूह चरणमा शुक्रबार अफगानिस्तान र त्यसपछि आयोजक जापानसँग प्रतिस्पर्धा गर्नेछ ।

नेपाली क्रिकेट टोलीले चौथोपटक एसियाली खेलकुदमा सहभागिता जनाउन लागेको हो । यसअघि नेपालले क्रिकेटतर्फ एसियाली खेलकुदमा क्वार्टरफाइनलसम्मको यात्रा गरेको थियो ।

यसपटक स्वर्णपदक जित्ने लक्ष्यसहित प्रतियोगितामा सहभागी हुन लागेको कप्तान दीपेन्द्रसिंह ऐरीले बताए ।

एसियाली खेलकुदका लागि नेपाली टोलीमा दीपेन्द्रसिंह ऐरी (कप्तान), सन्दीप लामिछाने, कुशल भुर्तेल, आसिफ शेख, रोहितकुमार पौडेल, आरिफ शेख, कुशल मल्ल, सन्दीप जोरा, लोकेश बम, गुलशनकुमार झा, करण केसी, सोमपाल कामी, नन्दन यादव, ललितनारायण राजवंशी र शेर मल्ल छन् ।