काठमाडौं । अमेरिकामा ग्यासोलीन र डिजेलको मूल्यमा भएको भारी वृद्धिको असर अब उद्योग तथा कृषि क्षेत्रमा पनि देखिन थालेको छ।

अमेरिकी समाचार संस्था सीएनएनको एक रिपोर्टमा अमेरिकी व्यवसायीहरू र किसानहरूसँगको कुराकानीका आधारमा इन्धनको बढ्दो मूल्यका कारण सिर्जना भइरहेका चुनौतीहरूलाई उजागर गरिएको छ।

रिपोर्टमा ‘इन्स्टिच्युट फर सप्लाई म्यानेजमेन्ट’ को मासिक सर्भेलाई उद्धृत गरिएको छ, जसमा धेरै अधिकारी र व्यवसायीहरूले वर्तमान परिस्थितिको तुलना कोरोना महामारीको समयसँग गरेका छन्।

रिपोर्टका अनुसार, केही व्यवसायीहरूले वर्तमान अवस्थालाई महामारीको समयभन्दा पनि बढी चुनौतीपूर्ण बताएका छन् र कोरोनाको समय अहिलेको परिस्थितिको तुलनामा राम्रो थियो भनी टिप्पणी गरेका छन्।

सीएनएनले एक कफी व्यवसायीलाई उद्धृत गर्दै ढुवानी व्यवस्थामा अवरोध, कन्टेनरको अभाव, रातो सागरको घट्नाक्रमका कारण बढेको लागत र रासायनिक मलको मूल्यमा भएको वृद्धिले व्यवसायमा दबाब बढाएको जनाएको छ।

सीएनएनका अनुसार, देशका विभिन्न उद्योगहरूसँग आवद्ध अमेरिकी व्यवसायीहरूले पनि यस्तै अवस्थाको सामना गरिरहेका छन्।