सुनसरी। नेपाली कांग्रेसको १५औं महाधिवेशनअन्तर्गत सुनसरी निर्वाचन क्षेत्र नम्बर ४ को क्षेत्रीय अधिवेशनमा मतदानका क्रममा दुई पक्षबिच तीव्र विवाद र झडप भएपछि निर्वाचन प्रक्रिया अनिश्चितकालका लागि स्थगित भएको छ।

मतदानस्थलमा भएको तनावग्रस्त स्थिति र अराजक गतिविधिका कारण स्थिति अनियन्त्रित बनेपछि स्थानीय नेता तथा कार्यकर्ताहरूले घटनामा संलग्न दोषीहरूमाथि कडा छानबिन गरी तत्काल कारबाही गर्न माग गरेका छन्।

सुनसरीको कोशी गाउँपालिकास्थित लौकही सिटी हलमा भइरहेको क्षेत्रीय अधिवेशनको मतदान प्रक्रिया चलिरहँदा मतपत्र र मतपेटिकालाई लिएर प्रतिस्पर्धी पक्षहरूबीच विवाद चर्किएको थियो।

क्षेत्रीय सभापति पदका उम्मेदवारहरूका समर्थकबिच सुरु भएको भनाभनले उग्र रूप लिँदा मतदानस्थलमै धकेलाधकेल र हातहालाहालको स्थिति सिर्जना भएको थियो।

सोही झडपका क्रममा उत्तेजित समूहले मतपेटिका तोडफोडको प्रयास गर्दा मतपेटिका ढलेर मतपत्रहरू जताततै छरपस्ट भएका थिए। उक्त  झडप र हुलदंगाका कारण केही मतदाता तथा उम्मेदवारहरू सामान्य घाइतेसमेत भएका छन्।

पार्टीको आन्तरिक लोकतान्त्रिक अभ्यासलाई उपहास गर्ने गरी मतदानस्थलमा केही गैरजिम्मेवार र अनुशासनहीन व्यक्तिहरूबाट भएको यस्तो हर्कतप्रति आम कार्यकर्ता तथा महाधिवेशन प्रतिनिधिहरूले तीव्र रोष प्रकट गरेका छन्।

उनीहरूले आन्तरिक निर्वाचनलाई दूषित पार्ने र हुलदंगा मच्चाउनेहरूमाथि निष्पक्ष छानबिन गरी कडा साङ्गठनिक कारबाही नगरिए पार्टीको साख र अनुशासन समाप्त हुने चेतावनी दिएका छन्।

घटनाको गम्भीरतालाई ध्यानमा राख्दै नेपाली कांग्रेस केन्द्रीय निर्वाचन समितिले सुनसरी क्षेत्र नम्बर ४ को प्रतिनिधिसभा क्षेत्रीय अधिवेशनअन्तर्गतका बाँकी सम्पूर्ण निर्वाचन कार्यक्रमहरू तत्कालका लागि स्थगित गर्न निर्देशन दिएको छ। समितिले पूर्ण रूपमा शान्तिपूर्ण, सुरक्षित र भयरहित वातावरण सुनिश्चित नभएसम्म निर्वाचन प्रक्रिया अघि नबढाउने स्पष्ट पारेको छ।

यसैबीच, निर्वाचन अधिकृतको कार्यालयका अनुसार हालसम्म खसेका मतपत्रसहितका मतपेटिकाहरूलाई सुरक्षा निकायको कडा निगरानीमा सुरक्षित रूपमा सिलबन्दी गरी राखिएको छ।

घटनाको सत्यतथ्य छानबिन गरी स्थगित निर्वाचन प्रक्रियालाई पुनः कसरी र कहिले अगाडि बढाउने भन्ने विषयमा केन्द्रीय निर्वाचन समितिले चाँडै आवश्यक निर्णय लिने जनाइएको छ।