वासिंटन डिसी।  अमेरिकी अधिकारीका अनुसार, नयाँ र अस्पष्ट सुरक्षा खतराका कारण संयुक्त राज्य अमेरिकाले आफ्ना लामो दूरीका बम्बर विमानहरूलाई अमेरिकी गृह स्टेशनमै फिर्ता लगेको छ।

बेलायत सरकारले ती विमानहरू तैनाथ गरिएको वायुसेना बेसलाई निशाना बनाउने इरानी षड्यन्त्रको आशंकामा केही व्यक्तिहरूलाई पक्राउ गरेको केही दिनपछि यो कदम चालिएको हो।

“हामी अहिले यो पुष्टि गर्न सक्छौँ कि RAF Fairford मा तैनाथ गरिएका सबै अमेरिकी बम्बरहरू अमेरिकास्थित आफ्ना गृह स्टेशनहरूमा फिर्ता भइसकेका छन्,” ती अधिकारीले सीएनएनलाई भने। तर, ती विमानहरू किन हटाइयो भन्नेबारे वक्तव्यमा विस्तृत विवरण खुलाइएको छैन।

घटनाक्रमबारे जानकार स्रोतले पछिल्लो खतरालाई ‘वास्तविक दुनियाँको घटना’  भनेका छन्। ती बम्बरहरूलाई क्षेत्रकै अर्को कुनै बेसमा स्थानान्तरण गर्नुको सट्टा सिधै अमेरिकास्थित आफ्नै गृह स्टेशनमा फिर्ता लैजानु अमेरिकी सेनाका लागि असामान्य विषय भएको अधिकारीले बताएका छन्।

बेलायतको रक्षा मन्त्रालयले भने यस विषयमा कुनै टिप्पणी गर्न अस्वीकार गरेको छ।

फेयरफोर्डस्थित रोयल एयर फोर्स  बेस इरानविरुद्धको युद्धमा संलग्न अमेरिकी B-1 बम्बरहरू तैनाथ गर्न प्रयोग गरिँदै आएको थियो। यो बेस लामो दूरीका आक्रमणहरू सञ्चालन गर्ने जिम्मेवारी पाएको अमेरिकी ‘ग्लोबल स्ट्राइक कमान्ड’ को एक कार्यसञ्चालन केन्द्र पनि हो।

उक्त कथित षड्यन्त्रबारे अनुसन्धान भइरहँदा बम्बरहरू स्थानान्तरण गरिएका हुन्। बेलायती प्रहरीले सेप्टेम्बर २७ मा सोही वायुसेना बेस नजिकैबाट आतङ्कवाद र विस्फोटक पदार्थसम्बन्धी कसुरको आशंकामा पाँच जना पुरुषहरूलाई पक्राउ गरेको थियो। ल

न्डन क्षेत्रका २३ देखि २५ वर्ष उमेरका ती बेलायती नागरिकहरूलाई घटनास्थलभेटिएका तीनवटा भ्यानमा कुनै विस्फोटक पदार्थ नभेटिएको पुष्टि गर्दै प्रहरीले द्रुत गतिमा धरौटीमा छाडेको थियो। उनीहरूलाई धरौटीमा छाडिएपछि अमेरिकी राष्ट्रपति डोनाल्ड ट्रम्पले आलोचना गर्दै भनेका थिए, “मैले त्यसो गर्ने थिएन।”

सोही कथित षड्यन्त्रको सम्बन्धमा बिहीबार २५ वर्षीय एक बेलायती-इरानी दोहोरो नागरिकलाई पनि पक्राउ गरिएको थियो।

बेलायती प्रधानमन्त्री एन्डी बरनहामले गत हप्ता उक्त घटनामा इरानको संलग्नता रहेको “बलियो संकेत” रहेको बताएका थिए।

“हामी उपयुक्त समयमा थप जानकारी दिनेछौँ, तर यसमा इरानको भूमिका रहेको हाम्रो विश्वासलाई हामी पुष्टि गर्न सक्छौँ,” सेप्टेम्बर ३० मा BBC सँग कुरा गर्दै उनले भनेका थिए।

बरनहामको भनाइले उक्त घटनामा विदेशी शक्तिको हात रहेको अमेरिकी मूल्यांकनलाई समर्थन गरेको देखिन्छ। अमेरिकी विदेशमन्त्री मार्को रुबियोले Fox News सँगको अन्तर्वार्तामा कथित षड्यन्त्रमा “विदेशी शक्तिको हात” रहेको बताएका थिए, तर विस्तृत विवरण दिन अस्वीकार गरे।

“मलाई लाग्छ यसले हामीलाई यहाँको वास्तविकतातर्फ जोड्छ। हामी संसारका त्यस्ता तत्वहरूसँग जुधिरहेका छौँ, र इरानको उदाहरण लिने हो भने, जसले विश्वभर अमेरिकी हितहरूमाथि आक्रमण गर्ने खुला धम्की दिएका छन्,” उनले भने।

यसैबिच, इरानले उक्त घटनामा आफ्नो कुनै पनि संलग्नता नरहेको दाबी गर्दै आरोपहरूलाई निराधार भनेको छ। इरानी सरकारी सञ्चारमाध्यमका अनुसार तेहरानस्थित बेलायती राजदूतलाई बोलाएर इरानका उपविदेशमन्त्री मजिद तख्त-रवान्चीले लन्डनलाई तेहरानप्रतिको आफ्नो “अनुचित दृष्टिकोण” सच्याउन आग्रह गरेका छन्।