तेहरान। मध्यपूर्वमा तनाव थप उत्कर्षमा पुगेको छ। युद्ध अन्त्यका लागि अमेरिकाले प्रस्तुत गरेको पछिल्लो जवाफप्रति इरानले तीव्र असन्तुष्टि व्यक्त गरेको छ।

इरानले उक्त प्रस्तावलाई अपर्याप्त ठहर गर्दै युद्ध पुनः चर्किएमा क्षेत्रीय डेटा सेन्टर, सञ्चार केबल तथा कृत्रिम बुद्धिमत्ता (एआई) सम्बन्धी पूर्वाधारहरूलाई लक्षित गर्न सक्ने कडा चेतावनी दिएको छ।

यसैबिच, इजरायलका पूर्व महान्यायाधिवक्ता अविचाई म्यान्डेलब्लिटले प्रधानमन्त्री बेन्जामिन नेतान्याहुविरुद्ध चलिरहेको भ्रष्टाचारसम्बन्धी मुद्दामा अदालतसमक्ष बयान दिएका छन्। आगामी निर्वाचन नजिकिँदै गर्दा नेतान्याहुको राजनीतिक भविष्यलाई लिएर चौतर्फी चासो र चर्चा बढेको छ।

अमेरिकी जवाफप्रति इरानको असन्तुष्टि र पूर्वाधार ध्वस्त पार्ने चेतावनी

इरानको सर्वोच्च राष्ट्रिय सुरक्षा परिषद्का प्रमुख मोहसेन रेजाईले युद्ध अन्त्य गर्ने विषयमा अमेरिकाबाट प्राप्त पछिल्लो जवाफ पर्याप्त नभएको बताए।

इरानको सरकारी समाचार संस्था आईआरएनएका अनुसार रेजाईले भने, “अमेरिकाले प्रस्तावका सात सर्तमध्ये केही स्वीकार गरे पनि अन्य विषयमा अझै स्पष्टता आवश्यक छ।” उनले युद्ध पुनः तीव्र भएमा क्षेत्रीय सञ्चार केबल, डेटा सेन्टर, एआई पूर्वाधारलगायतका महत्त्वपूर्ण संरचनाहरूलाई निशाना बनाउन सकिने चेतावनी दिए।

यसैबिच, इरानी रिभोलुसनरी गार्डको नौसेनाले होर्मुज जलडमरूमध्यबाट आवतजावत गर्ने जहाजहरूले आफ्नो नेभिगेसन तथा पहिचान प्रणाली बन्द गरेमा त्यस्ता जहाजलाई शत्रुतापूर्ण मानिने र सोहीअनुसार कारबाही गरिने जनाएको छ।

नेतान्याहुविरुद्धको भ्रष्टाचार मुद्दामा पूर्व महान्यायाधिवक्ताको बयान

इजरायलका पूर्व महान्यायाधिवक्ता अविचाई म्यान्डेलब्लिटले प्रधानमन्त्री बेन्जामिन नेतान्याहुविरुद्ध चलिरहेको भ्रष्टाचारसम्बन्धी मुद्दामा अदालतसमक्ष आफ्नो बयान दिएका छन्।

म्यान्डेलब्लिटले सात वर्षअघि नेतान्याहुविरुद्ध ठगी, विश्वासको दुरुपयोग तथा घुस लिएको आरोपमा औपचारिक अभियोग दायर गरेका थिए। इजरायलको इतिहासमा पदमा बहाल रहेका प्रधानमन्त्रीविरुद्ध भ्रष्टाचारको अभियोग दायर भएको यो नै पहिलो घटना थियो।

नेतान्याहुमाथि राजनीतिक लाभ हासिल गर्नका लागि धनी सहयोगीहरू तथा सञ्चारमाध्यमका प्रभावशाली व्यक्तिहरूसँग अनुचित सुविधा आदानप्रदान गरेको आरोप लागेको छ। यद्यपि, उनले आफूविरुद्ध लगाइएका सबै आरोपहरूलाई निरन्तर अस्वीकार गर्दै आएका छन्।

साउदी अरबमा सुरक्षा सतर्कता, हुथीद्वारा थप आक्रमणको चेतावनी

साउदी अरबको राजधानी रियादस्थित किङ खालिद अन्तर्राष्ट्रिय विमानस्थलको यात्रु टर्मिनलमा पुनः आक्रमण भएको छ। यसअघि शनिबार भएको आक्रमणमा परी १२ जनाको मृत्यु भएको थियो। पछिल्लो आक्रमणमा पनि केही व्यक्ति घाइते भएको साउदी अधिकारीहरूले पुष्टि गरेका छन्।

यमनका इरानसमर्थित हुथी विद्रोहीहरूले विमानस्थलमा भएका दुवै आक्रमणको जिम्मेवारी लिएका छन्। हुथीका सैन्य प्रवक्ता याह्या सारीले साउदी हवाई क्षेत्रमा उडान गर्दा हुन सक्ने सम्भावित जोखिमप्रति सचेत रहन सार्वजनिक आग्रह गरे।

यसैबिच, हुथीको नियन्त्रणमा रहेको अल-मसिरा टेलिभिजनले यमनको राजधानी सानामा पनि थप आक्रमण भएको जनाएको छ। उक्त आक्रमणका लागि हुथी पक्षले साउदी अरबलाई नै जिम्मेवार ठहर गरेको छ।

साउदी अधिकारीहरूले भने यस विषयमा अहिलेसम्म कुनै सार्वजनिक प्रतिक्रिया दिएका छैनन्। लगातार भइरहेका यी आक्रमणका घटनाहरूले साउदी अरब र हुथी विद्रोहीबिचको तनावलाई थप बढाएको छ भने अमेरिका र इरानबिच जारी युद्ध अन्त्य गर्ने प्रयासमा समेत नयाँ चुनौती खडा गरेको छ।

गाजामा आक्रमणपछि घर फर्किएका बासिन्दा भग्नावशेषको सामना गर्दै

इजरायली आक्रमणबाट प्रभावित मध्य गाजाका बासिन्दाहरू आफ्नो घरको अवस्था बुझ्न फर्किएका छन्। आक्रमणअघि उनीहरूलाई सुरक्षित स्थानमा जान आग्रह गरिएको थियो।

स्थानीय बासिन्दा बसाम आबेदका अनुसार करिब ३०० परिवार बसोबास गर्ने कम्तीमा १० वटा आवासीय भवनहरू पूर्ण रूपमा ध्वस्त भएका छन्। उनले प्रभावित परिवारहरूलाई सुरक्षित स्थानमा जानका लागि पर्याप्त समय उपलब्ध नगराइएको बताए।

यता, इजरायली सेनाले भने हमासका लडाकुहरूले सैनिकमाथि आक्रमण गर्न प्रयोग गर्दै आएको रकेट प्रक्षेपणस्थल र कमान्ड सेन्टरलगायतका सैन्य संरचनाहरूलाई मात्र लक्षित गरेर कारबाही गरिएको दाबी गरेको छ। युद्धविराम सम्झौता भएको एक वर्ष बितिसक्दा पनि गाजामा इजरायली आक्रमणहरू लगभग दैनिक रूपमा जारी रहेका छन्।

‘नाजा’ वृत्तचित्रबारे अनुधान गर्न नेतान्याहुको आग्रह

इजरायली प्रधानमन्त्री नेतान्याहुले ‘नाजा’ नामक वृत्तचित्रमा सहभागी व्यक्तिहरूबारे सूक्ष्म अनुसन्धान गर्न महान्यायाधिवक्ता र आन्तरिक सुरक्षा निकाय शिन बेटका प्रमुखलाई आग्रह गरेका छन्। उक्त वृत्तचित्रमा इजरायली सेनासँग सम्बन्धित व्यक्तिहरूले गाजामा सर्वसाधारणको ज्यान जाने घटनाबारे आफ्ना प्रत्यक्ष अनुभवहरू प्रस्तुत गरेका छन्।

नेतान्याहुले वृत्तचित्रमा इजरायल र उसको सेनाबारे भ्रामक तथा पक्षपातपूर्ण विवरणहरू प्रस्तुत गरिएको आरोप लगाएका छन्। उक्त वृत्तचित्र सार्वजनिक भएपछि इजरायलभित्र पनि विभिन्न किसिमका तीव्र प्रतिक्रियाहरू उत्पन्न भएका छन्।

दक्षिणी लेबनानमा गोलाबारीबाट अवकाशप्राप्त सैनिक अधिकारीको मृत्यु

लेबनानको सेनाले दक्षिणी लेबनानको याटेर सहरमा आफ्नो व्यक्तिगत सम्पत्तिको अवस्था बुझ्न गएका अवकाशप्राप्त सैनिक अधिकारी अली अब्दुल हसन स्वेइदानको इजरायली तोपको गोलाबारीमा परी मृत्यु भएको जनाएको छ।

लेबनानी सेनाका अनुसार स्वेइदानलाई इजरायली ट्यांकबाट प्रत्यक्ष निशाना बनाएर प्रहार गरिएको थियो। सेनाले उक्त घटनाप्रति कडा आपत्ति जनाउँदै यसलाई विद्यमान समझदारीको गम्भीर उल्लंकन भनेको छ।

यता, इजरायली सेनाका प्रवक्ताले भने उक्त घटनाबारे आफूहरूलाई कुनै जानकारी नभएको बताएका छन्। इरानसमर्थित लेबनानी सशस्त्र समूह हिजबुल्लाहसँग युद्ध सुरु भएयता इजरायलले दक्षिणी लेबनानको ठूलो भूभाग आफ्नो नियन्त्रणमा राखेको छ। यस घटनाले क्षेत्रीय सुरक्षा अवस्था र सर्वसाधारणको सुरक्षालाई लिएर थप गम्भीर चिन्ता उत्पन्न गराएको छ।