काठमाडौं। इजरायलको संसदीय निर्वाचनपछि मतगणना सुरु भएको छ।

यस निर्वाचनमा ७७.७ प्रतिशत मत खसेको निर्वाचन अधिकारीहरूले बताएका छन्। सन् १९९९ यताकै उच्च मतदान प्रतिशत भएको जनाइएको छ।

मतदान सकिएपछि सार्वजनिक भएका मत सर्वेक्षणले गादी आइसेनकोट नेतृत्वको गठबन्धन सबैभन्दा ठूलो समूहका रूपमा देखिए पनि सरकार गठनका लागि आवश्यक बहुमत नपुग्ने संकेत गरेका छन्। प्रधानमन्त्री बेन्जामिन नेतान्याहुको लिकुड पार्टी भने संसद्मा सबैभन्दा ठूलो एकल दल बन्ने अनुमान गरिएको छ।

प्रारम्भिक सर्वेक्षणमा नेतान्याहु र आइसेनकोट नेतृत्वका गठबन्धनबीच कडा प्रतिस्पर्धा देखिएको छ। केही सर्वेक्षणले दुवै पक्षले ५१ सिट पाउने अनुमान गरेका छन् भने अर्को सर्वेक्षणले नेतान्याहुको गठबन्धनलाई ५२ र आइसेनकोट पक्षलाई ५० सिट दिएको छ। इजरायली संसद्मा बहुमतका लागि १२० मध्ये कम्तीमा ६१ सिट आवश्यक पर्छ। त्यसैले अन्तिम नतिजापछि सरकार गठन गर्न दुवै पक्षलाई अन्य दलको समर्थन जुटाउनुपर्ने देखिएको छ।

यस निर्वाचनमा अरब समुदायको प्रतिनिधित्व गर्ने दलहरूले अहिलेसम्मकै बढी सिट जित्ने संकेत देखिएको छ। संयुक्त अरब सूची र संयुक्त सूचीले गरी १९ सिटसम्म प्राप्त गर्न सक्ने अनुमान गरिएको छ। अरब मतदाताको उल्लेख्य सहभागिताले निर्वाचनको परिणाममा प्रभाव पारेको विश्लेषण गरिएको छ।

यसअघि सरकार गठनमा अरब दललाई समावेश गर्न मुख्य दलहरू अनिच्छुक देखिए पनि यसपटकको कडा प्रतिस्पर्धाले उनीहरूको समर्थन निर्णायक बन्न सक्ने सम्भावना छ। अहिले मतगणना सुरु भएको बताइएको छ।