काठमाडौं। एशियाकप छनोट अन्तर्गत ओमानविरुद्धको खेलमा नेपालले ओमानलाई २२२ रनको लक्ष्य दिएको छ।

आज मलेसियाको बायोमास ओभलमा भइरहेको खेलमा नेपाली ब्याट्सम्यान सागर पुनको लामो इनिङ र अन्तिममा करण केसीको विष्फोटक ब्याटिङको मद्दतमा नेपालले ९ विकेटको २२१ रनको स्कोर खडा गरेको हो।

४९ औं ओभरमा ७ विकेट गइसकेपछि ब्याटिङमा आएका करणले मात्रै १० बलमा २६ रनको विष्फोटक इनिङ खेले । यसका लागि उनले २ छक्का र १ चौका प्रहार गरे । नेपालका लागि सागर पुनले सम्हालिएर ब्याटिङ गर्दै ८५ बलमा ८३ रनको योगदान दिए।

उनले ४४ रनको व्यक्तिगत स्कोरमा खेलिरहेका बेला छक्का हान्दै अर्धशतक बनाएका थिए । नेपालका लागि उपकप्तान ज्ञानेन्द्र मल्ल ४५ र आरिफ शेखले ३६ रनको योगदान दिए। सागरले सबैभन्दा लामो इनिङ खेल्ने क्रममा ६ चौका र २ छक्का प्रहार गरे । अन्य ब्याट्सम्यानले भने दोहोरो अंकमा रन बनाउन सकेनन्।

अब केहीबेरमा ओमन जवाफी ब्याटिङमा उत्रिँदैछ । आजको पहिलो खेलमा नेपालले टस हारेर पहिले ब्याटिङ गरेको हो । एसियाकपमा छनोट हुनको लागि नेपालले यो प्रतियोगिताको विजेता बन्नुपर्नेछ ।