काठमाडौं। भारतको उत्तर प्रदेशको महाराजगंज निल्लाको कोठिभार थाना क्षेत्रमा रहेको चिउटहा पुलिस चौकीले पुलिसले एक विद्युत कर्मचारीलाई बिना हेलमेट मोटरसाइकल चलाएको आरोपमा जरिवाना तिरायो । यसबाट रिसाएका विद्युत कर्मचारीले चौकीकै लाइन काटिदिए । पुलिसले ती कर्मचारीलाई समातेर चौकीमै राखे र पनि लाइन जोडिदिएपछि बल्ल छाडिदिए ।

आज तकको समाचार अनुसार मंगलबार विद्युत कर्मचारी अजीत कुमारले बिना हेल्मेट मोटरसाइकल चलाएका थिए । जसका कारण पुलिसले उनको चालान काटेको थियो । रिसाएका विद्युतकर्मीले बुधबार दिउँसो चौकीको विद्युत लाइन पोलबाटै काटिदिए । उनले लाइन काटेको थाना प्रमुख बृजेश कुमार सिंहले देखे । त्यसपछि तत्कालै पुलिसले उनलाई समातेर चौकीमा राखे ।

पुलिसले लाइन काट्नुको कारण सोध्दा विद्युतकर्मीले सन्तोषजनक जवाफ दिन सकेनन् । त्यसपछि पुलिसले विद्युत विभागका माथिल्ला अधिकारीलाई फोन गर्दा अधिकारहिरुले लाइन काट्नुपर्ने कारण नभएको बताएपछि अन्ततः अजीत कुमारले पुनः लाइन जोडिदिए ।