काठमाडौं। सरकारले शुक्रबार (आज) देखि लकडाउन खुकुलो पार्ने निर्णय गरेसँगै राजधानी काठमाडौंको जनजीवन सामान्य हुन थालेको छ। विहानै राजधानीमा चहल पहलमा वृद्धि भएको छ। पसल खुलेका छन् भने मानिसहरु र सवारी साधनको चहल पहलमा पनि वृद्धि भएको छ। आजैदेखि जोर–बिजोर प्रणालीमा निजी सवारी साधन चल्न दिइने सरकारले निर्णय गरेसँगै आज जोर नम्बर प्लेटका सवारी साधन संचालित भएका छन्।

महानगरीय ट्राफिक प्रहरी महाशाखाका अनुसार जोर गतेका दिन जोर नम्बर प्लेट भएको गाडी र बिजोर गतेका दिन बिजोर नम्बर प्लेट भएको गाडी चल्ने छन्। शुक्रबार जोर दिन भएकाले अन्तिममा जोर नम्बर भएका निजी गाडी चल्न सुरु भएका छन्। तर, निजी गाडी बेलुका ९ बजेदेखि बिहान ५ बजेसम्म भने चलाउन पाइने छैन। यो समयमा अत्यावश्यक वस्तु ढुवानी गर्ने गाडीलाई भने कुनै रोकतोक हुने छैन।

चार पाङग्रे निजी गाडीको हकमा चालकबाहेक दुई जना मात्रै यात्रा गर्न दिने व्यवस्था गरिएको छ। कोभिड–१९ सङ्क्रमणको जोखिमलाई मध्यनजर गरी कतिपय सेवामा लगाइएको प्रतिबन्धलाई भने अझै कायमै राखिएको छ। नागरिकको बढी उपस्थिति हुने ठाउँ तथा सार्वजनिक गाडी भने अहिले तत्काललाई खुलाइने छैन।

असार १ गतेदेखि सञ्चालन हुने सेवा
सरकाले आगामी असार १ गतेदेखि लागू हुने गरी केही सेवा सञ्चालन गर्ने निर्णय पनि गरेको छ। विभिन्न कार्यालयको सेवा भने दुई सिफ्टमा सञ्चालन गर्ने व्यवस्था मिलाइएको छ। बैक, वित्तीय संस्था, सहकारी, बीमा सेवा असार १ गतेबाट मात्रै सञ्चालन हुनेछन्।

यस्तै सरकारी कार्यालय तथा शिक्षण संस्थाका कार्यालय, गैरसरकारी तथा निजी क्षेत्रका कार्यालय, बैंक तथा वित्तयि संस्था ९दुई सिफ्टमा० सञ्चालन हुने छन् । सार्वजनिक तथा जोरविजोर प्रणालीमा सञ्चालन हुने गरी निजी सेवा प्रदायक कार्यालयका श्रमिक तथा कर्मचारी ओसारपसार गर्न प्रयोग गरिने सवारी साधनसमेत असार १ गतेबाट मात्रै सञ्चालन हुन पाउने छन् ।

उक्त सवारीमा एक लहरमा एक जना यात्रु मात्रै राख्नुपर्ने छ। यात्रुले अनिवार्य रुपमा मास्क र सेनिटाइजरको व्यवस्था गर्नुपर्ने र सवारीलाई दैनिक निसङ्क्रमित गर्नुपर्ने छ। उक्त सवारीमा आफ्नो कार्यालयमा काम गर्ने मजदुर तथा कर्मचारी मात्रै राख्नुपर्ने छ।

सञ्चालन गर्न नपाइने सेवा
सरकारले मानिसको बढी भिडभाड हुने र सहभागिता बढी हुने क्षेत्रको हकमा भने हालको व्यवस्थालाई नै कायम गरेको छ । त्यस्तो सेवा सञ्चालन गर्न पाइने छैन। जसअनुसार शैक्षिक संस्था, अनुमति प्राप्त बाहेकका अन्तर्राष्ट्रिय र आन्तरिक उडान, तोकिएका बाहेकका अन्तर्राष्ट्रिय सीमा नाकाबाट हुने आवागमन, सबै प्रकारका तालिम, सेमिनार, सभा, गोष्ठी र भेला पनि सञ्चालन गर्न पाइने छैन।

यस्तै सञ्चालन नहुनेमा सिनेमा हल, पार्टी प्यालेस डान्सबारलगायतका मनोरञ्जनस्थल, सार्वजनिक पुस्तकालय, सङ्ग्रहालय, चिडियाखाना, स्पा, शैलुन, तथा व्यूटीपार्लर, स्विमिङ्पुल, सपिङ मल, समूहमा खेलिने खुलकुद र खेलमैदान, सबै प्रकारका धार्मिक तथा सामाजिकस्थल यात्रुवाहक सवारी साधान छन्। जोरविजोर प्रणालीअन्तरगत उपत्यकाभित्र सञ्चालन हुने निजी सवारी बाहिर जान नपाउने तथा बाहिरका नीजि सवारी उपत्यका भित्रिन नपाउने व्यवस्था छ।