ड्रग्स केसमा सोधपुछपछि पहिलो पटक सार्वजनिक रुपमा देखिइन् सारा
मुम्बइ। ड्रग्स केसमा नारकोटिक्स कन्ट्रोल ब्यूरोमा बयानका लागि उपस्थित भएपछि सार्वजनिक जीवनबाट टाढा गएकी बलिउड अभिनेत्री सारा अली खान सार्वजनिक कार्यक्रममा सहभागी भएकी छिन् । उनी पछिल्लो पटक आफ्नो आउँदै गरेको फिल्म कुली नम्बर १ को प्रचारको लागि द कपिल शर्मा शोमा पुगेकी हुन् । शोमा साराको साथमा बरुण धवन पनि पुगेका थिए । सामान्य मेकअपमा गएकी सारा गुलाबी पोसाकमा देखिएकी थिइन् ।
सारा र बरुणको साथमा फिल्मका निर्माता ज्याकी भगनानी पनि पुगेका थिए । यसअघि साराले लामो अन्तरालपछि अष्टमीका दिन दशैंको शुभकामना दिएकी थिइन् । सारा र बरुणको फिल्म कुली नम्बर १ अमेजन प्राइममा रिलिज हुँदैछ । फिल्मको प्रिमियर क्रिसमसमा गर्ने तय भएको छ । पूजा इन्टरटेनमेन्टको लोकप्रिय फ्रेन्चाइजमा आधारित यो फिल्ममा सारा र बरुणसँगै परेश रावल, जावेद जाफरी, जोनी लिभर, राजपाल यादव लगायत कलाकार छन् । फिल्मको निर्देशन डेभिड धवनले गरेका हुन् ।
Facebook Comment