काठमाडौं। संसारकै सबैभन्दा ठूला अय्याशको रुपमा परिचित इन्स्टाग्रामका राजा कहलिने अमेरिकी जुवाडे ड्यान बिल्जारियन टाट पल्टिने संघारमा पुगेका छन् । उनको व्यवसाय निकै ठूलो नोक्सानीसँग जुधिरहेको छ । उनको सम्पत्ति, मोजमस्ती र खर्चको चर्चा र यससम्बन्धी रोचक घटनाहरु विश्वभरी प्रख्यात छन् । फोर्ब्सको एक रिपोर्टअनुसार अहिले भने बिल्जारियन संकटमा छन् किनकि उनको कम्पनी इग्नाइट कोरोना महामारीका कारण निकै ठूलो घाटामा छ ।

यद्यपि बिल्जारियनले यो कम्पनीमा फेरि पनि ठूलो रकम लगानी गरेका छन् । विभिन्न मिडिया रिपोर्टमा उनको कम्पनीको घाटा र उनले पुनः कम्पनीमा गरेको लगानीको परिमाण फरक फरक दावी गरिएको छ । अर्कोतर्फ बिल्जारियन भने उनको कम्पनी टाट पल्टिने संघारमा भएको दावी गर्दै प्रकाशित मिडिया रिपोर्टप्रति आक्रोश पोख्छन् । उनले हालै एक ट्वीटमा आफ्नो कम्पनी टाट पल्टिन्छ भनेर पर्खिरहेका मिडिया हेरेको हेर्यै हुने बताएका थिए ।

बिल्जारियनको जीवनशैली निकै बिलासी छ । उनी इन्स्टाग्राममा निकै सक्रिय रहन्छन् । इन्स्टाग्राममा उनका ३२.६ मिलियन फलोअर छन् । बिल्जारियनजस्तो बिलासी जीवन बाँच्ने अर्को व्यक्ति विश्वमा शायदै होलान् । हरेक समय युवतहिरुले घेरिएर रहने बिल्जारियन विचित्रका सोखको लागि पनि परिचित छन् । कहिले उनी सर्थ र गोहीले घेरिएका देखिन्छन् भने कहिले चार्टर्ड विमानमा घुमिरहेका देखिन्छन् ।

रिपोर्टका अनुसार २०१९ को सुरुवातमा बिल्जारियनको सम्पत्ति १५० मिलियन डलर थियो । उनका कैयौं व्यवसाय छन् र उनी पोकरका दक्ष खेलाडी मानिन्छन् । विश्वभरका कैयौं ठूला पोकर इभेन्टमा बिल्जारियन पुगेका हुन्छन् । उनको धनको सबैभन्दा ठूलो भाग पोकरबाटै आउने बताइन्छ । एक रिपोर्टका अनुसार बिल्जारियनलाई ड्रग्सको लत पनि छ । उनले ३० वर्ष नपुग्दै ड्रग्सको अधिक मात्रा लिएर एक दिनमै पटक पटक हृदयाघात पनि भएको थियो ।