पशुपति र वसन्तपुर क्षेत्रमा चिरोत्थान, फागु पर्व शुरु (फाेटाेफिचर) – Dcnepal

पशुपति र वसन्तपुर क्षेत्रमा चिरोत्थान, फागु पर्व शुरु (फाेटाेफिचर)

 

काठमाडाैं। फागुपूर्णिमा अर्थात् होली पर्व शुरु गर्नुअघि पशुपति र वसन्तपुर क्षेत्रका सात स्थानमा लिङ्गो गाड्ने काम (चिरोत्थान) गरिएको छ।

गुह्येश्वरी जङ्गलमा फाल्गुन शुक्ल अष्टमीका दिन बिहान मयलको हाँगो काटी गुह्येश्वरी, गोरखनाथ र पशुपतिमा चढाएर ती स्थानमा पनि लिंगाे गाडिने परम्परा रहेको युवा हिन्दू महासंघ वसन्तपुरका अध्यक्ष राजन महर्जनले जानकारी दिए। मयलको हाँगो काटेर ल्याई नेपाल पञ्चाङ्ग निर्णायक समितिले दिएको साइतअनुसार बिहान ८ः२६ बजे चिरोत्थान गरिएको हो।


वसन्तपुरका पनि चार स्थानमा चिरोत्थान गरिएको छ। हनुमानढोका दरबार क्षेत्रका सुन्दरीचोक, दाखचोक, हनुमान मन्दिरअघि र गद्दी बैठकअघि गरी चार स्थानमा लिंगाे गाडिएको छ। पशुपति र वसन्तपुर दरबार क्षेत्रका सात स्थानमा लिङ्गो गाड्ने चलन प्राचीनकालदेखि रही आएको छ। आज बिहान चिरोत्थान गरिएसँगै फागु पर्व शुरु भएको मानिन्छ । फाल्गुन शुक्ल पूर्णिमाका दिन फागुपूर्णिमा पर्व मनाइन्छ।

फाल्गुन शुक्ल अष्टमीका दिन गाडिएको लिङ्गो फाल्गुन शुक्ल पूर्णिमाका दिन बेलुकी ८ः३६ बजे ढाल्न शुभ हुने साइत समितिले दिएको छ। लिंगाे ढालेर त्यसै बेलुकी ८ः५६ मा दहन गर्नुपर्ने समितिले जनाएको छ। चिरोत्थानका लागि मयलको हाँगो काट्ने, ल्याउने र गाड्ने काममा वसन्तपुर क्षेत्रका मानन्धर समाजका सदस्य सक्रिय हुने परम्परा रही आएको छ। रासस

सबै तस्वीर : अमृतकुमार लामिछाने/ डिसी नेपाल

Facebook Comment


सम्बन्धित खवर

ताजा भिडियो