अमेरिकाद्वारा रुसमाथि कडा प्रतिबन्ध घोषणा
वासिङटन(एजेन्सी)। अमेरिकाले रुसमाथि कडा प्रतिबन्ध लगाएको छ। बाइडेन प्रशासनले बिहीबार रुसमाथि कडा नयाँ प्रतिबन्धको घोषणा गरेको हो। एक अमेरिकी सरकारी निकायमा साइबर आक्रमण गरेको आरोपमा अमेरिकाले रुसमाथि नयाँ प्रतिबन्ध लगाएको हो। अमेरिकाले रुसी गुप्तचर निकायलाई साइबर आक्रमणमा दोषी ठहर गर्दै प्रतिबन्ध लगाएको हो। अमेरिकाले पहिलो पटक साइबर आक्रमणका लागि रुसी गुप्तचर एजेन्सीमाथि दोष लगाएको यो पहिलो घटना भएको अमेरिकी सञ्चार माध्यमहरुले जनाएका छन्।
यो नयाँ प्रतिबन्धले रुसी अर्थतन्त्रलाई प्रभावित पार्ने अमेरिकाको विश्वास छ। कार्यकारी आदेशमा राष्ट्रपति बाइडेनले एकपछि अर्को गर्दै थप कदम चाल्ने घोषणा गरेका छन्। सूचनाको गलत प्रयासका लागि ३२ संस्था र व्यक्तिमाथि प्रतिबन्ध लगाइएको छ। सन् २०२० को राष्ट्रपतीय निर्वाचनमा रुसी सरकारले हस्तक्षेप गरेको आरोपमा पनि प्रतिबन्ध केन्द्रित रहेको छ। अधिकांश गुप्तचर सहयोगी भनेर चिनिने दस जना रूसी कूटनीतिज्ञलाई वासिङ्टनस्थित रूसी दूतावासबाट निकालिएको छ। क्राइमियामा रूसको आधिपत्यसँग सम्बन्धित आठ जना र संस्थाहरूलाई अनुमति दिने युरोपेली साझेदारहरूमाथि पनि प्रतिबन्ध लगाइएको छ।
पछिल्ला दिनहरुमा रुसले युक्रेनसँगको सीमानामा ८० हजार सेनाको तैनाथी गरेको चर्चा भएका बेला अमेरिकाले यो प्रतिबन्ध लगाएको हो। रुस र युक्रेनबीच तनाव बढेपछि रुसले सिमामा सेना तैनाथी बढाएको छ। रुसले युक्रेनलाई कब्जामा लिन लागेकोसमेत चर्चा चलेको छ। २०१४ मा रुसले युक्रेनको रुसी भाषी क्षेत्र क्राइमियालाई कब्जामा लिएको थियो।
Facebook Comment