काठमाडौं। भारतको अमृतसरस्थित श्री दरबार साहिबमा शिख धर्मको अपमान गरिएको भन्दै एक युवकको भिडले कुटेर हत्या गरेको घटना सेलाउन नपाउँदै फेरि अर्को घटना भएको छ । कपूरथला जिल्लाको निजमपुर गाउँको गुरुद्वारामा एक व्यक्तिले निशान साहिबको अपमान गरेको भन्दै भिडले फेरि अर्का युवकलाई निर्घात कुटपिट गरेका छन् । गाउँलेहरुले ती युवकलाई समातेर निर्घात कुटपिट गरेर भिडियो पनि बनाएका छन् ।

भिडियोमा गाउँलेहरुले नजिकै पुलिस चौकी छ तर उसलाई पुलिसलाई बुझाउँदैनौं भन्दै गरेको सुनिन्छ । उनीहरुले शिख संगठनहरुलाई बोलाएको र उनीहरुले नै यसको फैसला गर्ने, त्यतिबेलासम्म युवकलाई आफ्नै नियन्त्रणमा राख्ने बताएका छन् । कुटपिटपछि युवक गायब छन् । उनी कहाँ छन् भन्ने कुनै जानकारी छैन । पुलिसले पनि उनलाई हिरासतमा लिएको पुष्टि गरेको छैन ।

गाउँलेहरुका अनुसार कपूरथला रोडमा निजामपुर मोड गुरुद्वारा साहिबमा अपमानको कोसिस भएको बताएका छन् । बिहान करिब ४ बजे गाउँलेहरु नितनेम गर्नको लागि उठे । त्यतिबेला यी व्यक्ति निशान साहिबको अपमान गरिरहेका थिए । गाउँलेहरु पुगेपछि आरोपी भाग्ने कोसिस गरेका थिए । २ घण्टा पिछा गरेपछि उनलाई समातिएको हो ।

गाउँलेले युवक दिल्लीबाट आएको बताएका छन् । सोधपुछमा युवकले आफूलाई पैसा दिएर यस्तो गर्न पठाइएको बताउका छन् । उनले यसबाहेक आफ्नो बारे केही बताएका छैनन् । उनले आफ्नो नाम पनि बताएका छैनन् । यसअघि अमृतसरस्थित शिख धर्मको सर्वोच्च स्थान श्री दरबार साहिबमा एक व्यक्तिले श्री साहिबको अपमान गरेपछि भिडले कुटपिट गर्दा उनको मृत्यु भएको थियो ।