काठमाडौं । पूर्वी जापानमा भएको कीर्तिमानी भीषण वर्षाका कारण कम्तीमा आठ जनाको मृत्यु भएको छ। अविरल वर्षा र बाढीका कारण टोकियोस्थित नारिता अन्तर्राष्ट्रिय विमानस्थलमा हजारौँ यात्रुहरू अलपत्र परेका छन्।

अधिकारीहरूका अनुसार मृत्यु हुनेहरूमा एक महिलासमेत रहेकी छन्, जसको बाढीले भरिएको सडकमा डुबेको कारभित्रै ज्यान गएको थियो। अन्य दुई जना सडकमा लडेका थिए र पछि उनीहरूको मृत्यु भएको थियो।

अधिकारीहरूले यो वर्षालाई “अभूतपूर्व” भनेका छन्। चिबा प्रान्तमा भारी वर्षाका कारण २० हजारभन्दा बढी घरहरूमा बिजुली आपूर्ति अवरुद्ध भएको छ।

स्थानीय अधिकारीहरूले बिहीबार ‘लेभल-५’ को आपत्कालीन चेतावनी जारी गरेका थिए, जुन जापानमा विपत्तिको सबैभन्दा उच्च तहको अलर्ट हो।

शुक्रबार बिहान यसलाई घटाएर ‘लेभल-४’ मा ल्याइएको छ। यद्यपि, अधिकारीहरूले पहिरो र बाढीको जोखिम अझै कायम रहेकाले उच्च सतर्कता अपनाउन चेतावनी दिइरहेका छन्।

यस साता जापान र छिमेकी देशहरूमा एकपछि अर्को गर्दै लगातार कैयौँ समुद्री आँधीहरू (टाइफुन) आएका छन्। मौसमविद्हरूले यस वर्षको आँधीको मौसम सामान्यभन्दा बढी सक्रिय रहने अनुमान व्यक्त गरेका थिए।

जापान मौसम विज्ञान एजेन्सीका अनुसार देशको पूर्वी भागमा तातो र ओसिलो हावा प्रवेश गरेका कारण यो भीषण वर्षा भएको हो।

यो वर्षा शुक्रबार देर रातिसम्म जारी रहने अनुमान गरिएको छ।

अधिकारीहरूका अनुसार टोकियोसँगै जोडिएको चिबामा बिहीबार दिउँसोदेखि प्रतिघण्टा १०० मिलिमिटरभन्दा बढी वर्षा मापन गरिएको छ।

यो अगस्ट महिनामा हुने औसत वर्षाभन्दा करिब तीन गुणा बढी हो। यो जापानमा हालसम्म दर्ता गरिएको सबैभन्दा बढी वर्षासमेत हो।

चिबाका गभर्नर तोसिहितो कुमागाईले शुक्रबार बिहान पत्रकारहरूसँग कुरा गर्दै भने, “जापानको इतिहासमा मौसमी अभिलेख र मानकहरूलाई हेर्दा पनि यो स्थिति अत्यन्तै अस्वाभाविक र भयानक थियो।”