काठमाडौं। भारतको केरल राज्यको अलप्पुझामा १२ घण्टाभित्र २ जना उच्च नेताको हत्या भएपछि यहाँ हिंसाको त्रास बढेको छ । हत्या गरिएका नेतामध्ये एक सोसल डेमोक्रेटिक पार्टी अफ इण्डियाका नेता थिए भने अर्का भारतको केन्द्र सरकारको सत्ताधारी भारतीय जनता पार्टीका नेता थिए । घटनापछि हिंसाको त्रासले आइतबार अलप्पुझा जिल्लामा संकटकालीन कानुन अर्थात सीआरपीसी धारा १४४ लागू गरिएको छ ।

केरलका मुख्यमन्त्री पिनाराइ विजयनले दुवै हत्याको निन्दा गर्दै कडा कारवाहीको आश्वासन दिएका छन् । उनले भने ‘हिंसाका यस्ता जघन्य र अमानवीय कृत्य राज्यको लागि खतरनाक छन् । मलाई विश्वास छ कि सबै जनताले यस्ता हत्यारा समूहको पहिचान गर्ने र उनीहरुलाई अलग थलग गर्नको लागि तयार हुनेछन् ।’

Kerala: I’ve been told that State Secy of BJP OBC Morcha was stabbed to death, this morning. This is the handy work of Islamic terrorist group is the info coming from Alleppey (Alappuzha). I demand the State govt to take strict action against perpetrators:Union Min V Muralidharan https://t.co/VRuiureFOH pic.twitter.com/BW8Z9riTjR

— ANI (@ANI) December 19, 2021

केरलमा एसडीपीआइका प्रदेश सचिव के एस शानमाथि शनिबार राती घर फर्किंदै गर्दा आक्रमण भएको थियो । उनको मोटरसाइकललाई कारले ठक्कर दिइएको थियो त्यसपछि उनीमाथि चक्कुले आक्रमण गरिएको थियो । घटनामा गम्भीर घाइते शानको आधा रातमा कोच्चिको एक अस्पतालमा मृत्यु भएको थियो । पुलिसका अनुसार त्यसको केही घण्टापछि आइतबार बिहान केही आक्रमणकारीहरुले भाजपाका अन्य पिछडा वर्ग (ओबीसी) मोर्चाका प्रदेश सचिव रंजीत श्रीनिवासको घरमा घुसेर उनको हत्या गरिदिए ।

एसडीपीआइले शानको हत्यामा भाजपाको भातृ संगठन राष्ट्रिय स्वयंसेवक संघका एक कार्यकर्ताको हात भएको आरोप लगाएको छ । भाजपाले पनि श्रीनिवासमाथि एसडीपीआइसँग सम्बद्ध इकाइ पीएफआइले बदला लिनको लागि आक्रमण गरेको र उनको हत्या गरेको आरोप लगाएको छ । एसडीपीआइ पिएफआइको राजनीतिक इकाइ हो । बीजेपी प्रदेश अध्यक्ष के सुरेन्द्रनले पछिल्लो ६० दिनमा बीजेपी कार्यकर्ताको तेस्रो हत्या भएको बताएका छन् ।