काठमाडौं । युक्रेनका राष्ट्रपति भोलोदिमिर जेलेन्स्कीले जारी युद्ध अन्त्य गर्न रुसी राष्ट्रपति भ्लादिमिर पुटिनलाई भेटको लागि अपिल गरेका छन् । कीभको मेट्रो स्टेशनमा पत्रकारहरूसँग कुरा गर्दै जेलेन्स्कीले भने, ‘मलाई लाग्छ कि जसले युद्ध सुरु गर्यो उसले यसलाई अन्त्य गर्न सक्षम हुनेछ।’ जेलेन्स्कीले पुटिनलाई युद्ध अन्त्य गर्न धेरै पटक अपिल गरिसकेका छन्। यसबीचमा दुवै देशका प्रतिनिधिमण्डलबीच पटक–पटक विभिन्न ठाउँमा वार्ता भएपनि निष्कर्ष निस्किएको छैन ।

अर्कोतर्फ अमेरिकी विदेशमन्त्री एन्टोनी ब्लिन्केन आइतबार कीभ आउने जानकारी जेलेन्स्कीले दिएका छन् । जेलेन्स्कीले पेन्टागनका प्रमुख लोयड अस्टिन पनि ब्लिन्केनसँग कीभ जाने बताए। युक्रेनको सुरक्षाबारे छलफल गर्न मंगलबार अमेरिकी पक्षबाट जर्मनीमा ठूलो बैठक बस्ने उनले बताए । यस बैठकअघि पेन्टागनका प्रमुख र अमेरिकी विदेशमन्त्रीले युक्रेनको राजधानी किभको भ्रमण गर्नेछन् ।

युक्रेनमा रहेको रुसी सेनाले शनिबार दक्षिणी सहर मारिउपोलमा रहेको एउटा स्टिल प्लान्टमा आक्रमण गर्ने प्रयास गरेको थियो । उक्त प्लान्टमा ठूलो संख्यामा युक्रेनी सैनिक र आम मानिस लुकेर बसेको बताइएको छ । आक्रमण पछि, क्रेमलिनले उसको सेनाले मारिउपोलको अजोभस्टल प्लान्ट बाहेक सम्पूर्ण शहर कब्जा गरेको दावी गरेको थियो। रूसले दक्षिणी र पूर्वी युक्रेनका अन्य बस्ती र शहरहरूलाई पनि घेरेको छ।

युक्रेनको तर्फबाट दुई दिनअघि स्टिल प्लान्टमा महिला र बालबालिका लुकेर बसेको भिडियो खिचिएको बताइएको छ । कतिपयले दुई महिनासम्म घाम नदेखेको कुरा पनि गरेका छन् । भिडियोमा एउटी महिलाले भनिन्, ‘हामी शान्ति चाहन्छौं, खुल्ला हावामा सास फेर्न चाहन्छौं ।’

शनिबार रुसी सेनाले युक्रेनी सहर ओडेसामा क्रुज मिसाइल आक्रमण गरेको थियो । आक्रमणमा परी तीन महिनाकी बालिका सहित ६ जनाको मृत्यु भएको थियो । रुसी सेनाले पूर्वी डोनबास क्षेत्रका धेरै गाउँहरू कब्जा गरेको दाबी गरेको छ। यससँगै हतियारका तीन गोदामसहित युक्रेनी सैनिकका करिब ११ बङ्करलाई निशाना बनाइएको छ ।

अर्कोतर्फ, एसोसिएटेड प्रेस पत्रकारहरूले पनि युक्रेनको दोस्रो ठूलो सहर खार्किभको आवासीय क्षेत्रमा गोलाबारी देखेको कुरा गरेका छन्। खार्किभका गभर्नर ओलेह सिनेहुबोभले रुसी आक्रमणमा तीन जनाको ज्यान गएको बताए । यसै क्रममा डोनबासको लुहान्स्क क्षेत्रमा रुसी सैनिकको गोली लागेर ६ जनाको मृत्यु भएको छ ।

युक्रेनको राष्ट्रपति कार्यालयका सल्लाहकार ओलेक्सी एरेस्टोभिचले शनिबार एक ब्रीफिङका क्रममा रुसी सेनाले अजोभस्टल प्लान्टमा हवाई आक्रमण पुनः सुरु गरेको बताए । युक्रेनी अधिकारीहरूले आफ्नो करिब २,००० सैनिक प्लान्ट भित्र रहेको अनुमान गरेका छन्। यहाँ सर्वसाधारणले पनि शरण लिएका छन् । एरेस्टोभिचले भने कि युक्रेनी सेनाले नयाँ आक्रमणको प्रतिकार गर्ने प्रयास गरिरहेको छ।