काठमाडौं । टर्कीका राष्ट्रपति रेसेप तैयप एर्दोगानले साउदी अरबको भ्रमणका क्रममा दुई देशबीचको आर्थिक सम्बन्धलाई मजबुत बनाउने उद्देश्यप्रति सन्तुष्टि व्यक्त गरेका छन् । साउदी अरेबियाको आधिकारिक समाचार एजेन्सी साउदी प्रेस एजेन्सी (एसपीए) ले आइतबार यो जानकारी दिएको हो।

एर्दोगानले साउदी युवराज मोहम्मद बिन सलमानसँग दुई देशबीचको सम्बन्धमा सुधार ल्याउने धेरै बुँदाहरूमा छलफल गरेको बताए। उनले “टर्की र साउदी अरेबिया बीचको महत्वपूर्ण आर्थिक सम्भावना” लाई हाइलाइट गरे र एक्स्पो २०३० को आयोजना गर्न साउदीको बोलीको लागि समर्थन व्यक्त गरे ।

वर्षौंपछि दुवै देशका नेताबीच बिहीबार भेट भएको थियो । सन् २०१७ यता अर्दोगानको यो पहिलो पटक साउदी अरबको भ्रमण थियो। अर्दोगानले साउदी अरेबियाका राजा सलमान बिन अब्दुलअजिज र युवराज मोहम्मद बिन सलमानसँग भेट गरे।

सन् २०१८ मा इस्तानबुलस्थित साउदी वाणिज्य दूतावासमा पत्रकार जमाल खशोग्गीको हत्यापछि साउदी अरेबिया र टर्कीबीचको सम्बन्ध तनावपूर्ण बनेको छ। टर्कीको राष्ट्रपति कार्यालयले एक विज्ञप्ति जारी गर्दै बिहीबार जेद्दाहको रेड सी सहरमा रहेको अल–सलाम दरबारमा एक औपचारिक समारोहमा राजा सलमानसँग भेट गरेको जनाएको छ ।

जेद्दाह प्रस्थान गर्नु अघि पत्रकारहरूसँग कुरा गर्दै एर्दोगानले बिहीबारको भ्रमण सम्बन्ध सुधार गर्न र राजनीतिक, सैन्य र सांस्कृतिक सम्बन्धलाई सुदृढ गर्ने “हाम्रो चाहनाको अभिव्यक्ति” भएको बताए। उनले स्वास्थ्य, ऊर्जा, खाद्य सुरक्षा, रक्षा उद्योग, वित्तलगायतका क्षेत्रमा सहकार्य दुवै देशका लागि राम्रो साबित हुने बताए ।