काठमाडौं । रूसको जनसंख्या घट्दै गएको छ। यसबाट देशका राष्ट्रपति भ्लादिमिर पुटिन चिन्तित भएका छन् । उनले यस संकटबाट बाहिर निस्कन महिलालाई १० सन्तान जन्माउन आग्रह गरेका छन् । यसो गरेमा महिलालाई १ मिलियन रुबल दिइनेछ ।

१० सन्तान जन्माउने महिलालाई ‘मदर हिरोइन’ नामको अवार्ड दिइनेछ । यो पुरस्कार दोस्रो विश्वयुद्धका बेला पनि महिलालाई दिइएको थियो । त्यतिबेला पनि रुसको जनसङ्ख्या तीव्र गतिमा घटिरहेको थियो । सन् १९९१ मा सोभियत संघ टुटेपछि रुसले यो अवार्ड दिन बन्द गरेको थियो ।

पुटिनले अगस्ट १५ मा एक आदेश जारी गरे। यस अनुसार महिलालाई एकैपटक पूरा रकम दिइनेछ । यो रकम १० औं बच्चा एक वर्षको भएपछि (१० औं बच्चाको पहिलो जन्मदिनमा) आमाको खातामा स्थानान्तरण गरिनेछ। कुनै आक्रमणमा आमाले बच्चा गुमाएमा वा कुनै कारणले बच्चाको मृत्यु भएमा पनि आमालाई पूरै पैसा दिइनेछ ।

पुटिनको निर्णयको रूसी राजनीतिमा निन्दा भइरहेको छ र सुरक्षा विशेषज्ञ डा जेनी माथर्सले यो निर्णयको निन्दा गरेका छन् । उनले भने– यो वास्तवमा निकै निराशाजनक कदम हो । मेरो मतलब के हो भने रूसको जनसंख्या निश्चित रूपमा घटेको छ। सन् १९९० को दशकदेखि जनसङ्ख्या बढाउने प्रयास भइरहेको छ । रुस–युक्रेन युद्धपछि अवस्था झन् जटिल बन्दै गएको छ । धेरै रुसी सैनिकले ज्यान गुमाएका छन् ।

कोरोनाले मानिसको ज्यान समेत लिएको छ । यो महिलालाई ठूलो परिवार बनाउन प्रोत्साहन गर्ने प्रयास हुन सक्छ तर १ मिलियन रुबलमा १० सन्तान कसरी हुर्काउने ? यस बीचमा तिनीहरू सबै कहाँ बस्न जाँदैछन्? रूसमा धेरै आर्थिक, सामाजिक र राजनीतिक समस्याहरू छन्।