काठमाडौं । बिहेको भोलिपल्ट बेहुलाको मृत्यु भयो । विवाहमा सहभागी ५ पाहुनाको पनि मृत्यु भएको छ । यति मात्र होइन, बेहुली पनि बेहोस अवस्थामा फेला परिन् । हाल बेहुलीसहित अन्य ७ जनाको अस्पतालमा उपचार भइरहेको छ । अचानक भएको यो घटनाले उत्सवको माहोल शोकमा परिणत भएको छ । यो घटना अफ्रिकी देश नाइजेरियाको हो ।

डेली मेलका अनुसार ३३ वर्षीया ओबिना डिकको शुक्रबार एनुगु शहरमा नेबेची नामकी युवतीसँग विवाह भएको थियो । यस विवाहमा दुलहा र दुलही पक्षबाट ठूलो संख्यामा पाहुनाहरू उपस्थित थिए। तर, विवाहको भोलिपल्ट १४ जना बेहोस अवस्थामा भेटिएका थिए । यी १४ जनामा ​​दुलहा र दुलही पनि परेका थिए । स्थानीय प्रहरीका अनुसार उनीहरु सबैको मुखबाट फिँज निस्किएको थियो ।

त्यसपछि सबैलाई अस्पतालमा भर्ना गरिएको थियो, जहाँ दुलाहा ओबिना र पाँच जनालाई मृत घोषित गरिएको थियो। सोही क्रममा दुलही नेबेची र अन्य सात पाहुनाको अस्पतालमा उपचार भइरहेको छ ।

मृत्युको वास्तविक कारण पत्ता लगाउन मृतकको पोष्टमार्टम गरिएको छ । मृत्युको कारण ‘फुड पोइजनिङ’ वा विषाक्त ग्यास हुन सक्ने स्थानीयले आशंका गरेका छन् । बिहेमा घरभित्र जेनेरेटर चलिरहेको थियो । यसको धुवाँका कारण दुर्घटना भएको हुनसक्ने आशंका पनि गरिएको छ । हाल घटनाको अनुसन्धान भइरहेको छ ।

यता, प्रहरी प्रवक्ता ड्यानियल नेदुवेले बिहेको भोलिपल्ट छिमेकीले घरको ढोका तोडेको बताए । उनले देखे कि धेरै पाहुनाहरू अचेत अवस्थामा थिए र उनीहरूको मुखबाट फिँज निस्किरहेको थियो। अस्पताल पुग्नेबित्तिकै ६ जनालाई मृत घोषणा गरिएको थियो ।

एक समुदायका नेताले ओबिना र नेबेची र उनीहरूका पाहुनाहरूले मृत्युको अघिल्लो रात पार्टी गरेको बताए। नेताले आशंका व्यक्त गर्दै भने– यी मानिसहरूले पानी परेपछि घरभित्र जेनेरेटर ल्याएर घरको ढोका थुनेर सुते । यसले विषाक्त ग्यास बनायो।