काठमाडौं । आकाशमा उडान भरेपछि २ विमान एकअर्कासँग ठोक्किनबाट मुस्किलले जोगिएका छन् । यो घटना अगस्ट १७ मा अमेरिकाको ओर्लान्डो अन्तर्राष्ट्रिय विमानस्थल नजिक भएको हो । यो दुर्घटना भएको भए ठूलो संख्यामा मानिसको ज्यान जान सक्ने थियो ।

घटनाको भिडियो ‘सिंगल इन्जिन प्लेन सेस्ना’ मा रेकर्ड गरिएको थियो। दुवै विमान ओर्लान्डो अन्तर्राष्ट्रिय विमानस्थलबाट उडेका थिए। अहिले संघीय उड्डयन प्रशासन (एफएए) ले यस घटनाको अनुसन्धान गरिरहेको छ। सेस्ना पाइलट मलिक क्लार्कले हालै एबीसीसँग यस घटनाको बारेमा कुरा गरे।

घटनाको हवाई फुटेजमा सेस्ना नामको सिंगल इन्जिन भएको विमान डेल्टा एयरको बोइङ ७५७ यात्रुवाहक जेटसँग ठोक्किनबाट जोगिएको देख्न सकिन्छ । दुवै विमान ५ सय फिट माथि र तल गए ।

पाइलट मलिक क्लार्कले अगस्ट १७ मा एउटा ठूलो विमान आफूतर्फ आइरहेको देखे, यो देखेर उनले आफ्नो विमानलाई दायाँतिर मोडे । यदि उनले यसो नगरेको भए दुवै विमान भिड्ने थियो ।

घटनाको भिडियो पाइलट मलिक क्लार्कले सामाजिक सञ्जालमा सेयर गरेका छन् । भिडियो सेस्ना विमानको ककपिटबाट रेकर्ड गरिएको थियो। डेल्टा प्लेन सेस्ना प्लेनतर्फ आइरहेको देखिन्छ । दुबै विमानले एकअर्कालाई पार गरे, त्यसपछि दुबै पाइलटले एयर ट्राफिक कन्ट्रोलसँग कुरा गरे। घटनाको अनुसन्धान गरिरहेको संघीय उड्डयन प्रशासनले ट्रान्सक्रिप्ट पनि जारी गरेको छ ।

एयर ट्राफिक कन्ट्रोलको प्रतिनिधित्व गर्ने राष्ट्रिय हवाई ट्राफिक कन्ट्रोलर एसोसिएसनले यस विषयमा टिप्पणी गर्न अस्वीकार गर्‍यो। संघले नीति अनुसार यस्तो गरेको हो । यसैबीच, ओरलान्डो अन्तर्राष्ट्रिय विमानस्थलले पनि यस विषयमा अहिलेसम्म कुनै प्रतिक्रिया दिएको छैन। यो घटना कसरी र किन भयो र यो लापरवाहीको जिम्मेवार को हो भन्ने पत्ता लगाउन यस विषयमा अनुसन्धान भइरहेको छ ।