काठमाडौं । किर्गिस्तान-ताजिकिस्तान सीमामा भएको झडपमा हालसम्म ९४ जनाको ज्यान गएको छ । मध्य एसियाका यी दुई देशबीच बुधबारदेखि झडप जारी थियो । शुक्रबार दुवै पक्षबीच युद्धविरामको घोषणा भएको थियो ।

यी दुई छिमेकी मुलुकबीच सीमानाका बारेमा फरक मत भएकाले सीमा विवाद छ । रुसी राष्ट्रपति भ्लादिमिर पुटिनले दुई देशलाई आफ्ना मतभेद शान्तिपूर्ण रूपमा समाधान गर्न अपिल गरेका छन् । ताजिकिस्तान र किर्गिस्तान बीच एक हजार किलोमिटर सीमा छ। दुवै देश एक तिहाइमा सहमत छैनन्।

सन् २०२१ मा पनि दुई देशबीच यस्तै द्वन्द्व भएको थियो जसमा करिब ५० जनाको ज्यान गएको थियो । तर पछिल्ला दिनमा सुरु भएको हिंसामा करिब सय जनाको ज्यान गएको छ ।

आइतवार, किर्गिस्तानले थप १३ जनाको मृत्यु भएको पुष्टि गरेको छ। अधिकारीहरुले अहिलेसम्म आफ्नो देशका ५९ जनाको ज्यान गएको बताएका छन् । साथै सयभन्दा बढी घाइते भएको बताइएको छ ।

अर्कोतर्फ ताजिकिस्तानले आफ्ना ३५ नागरिकको मृत्यु भएको र कम्तीमा २० जना घाइते भएको जनाएको छ । अन्तर्राष्ट्रिय दबाबका कारण शुक्रबार दुवै देशले युद्धविरामको घोषणा गरेका थिए ।