काठमाडौं । पाकिस्तानको खैबर पख्तुनख्वाका धेरै क्षेत्रमा हजारौं मानिसले प्रदर्शन गरेका छन् । करिब ४० घन्टापछि यी विरोध प्रदर्शन सकिएका हुन् ।

स्वातमा भ्यान चालकलाई गोली हानेर हत्या गरेको विरोधमा यी विरोध प्रदर्शन भइरहेका थिए तर प्रशासन र आन्दोलनकारीबीच सहमति भएपछि अहिले शवको दाहसंस्कार गरी प्रदर्शन फिर्ता गरिएको छ ।

सोमबार बिहान स्वातको चारबाग तहसील क्षेत्रमा एउटा स्कुल भ्यानमा हमला हुँदा भ्यान चालकको मृत्यु भएको छ भने दुई बालबालिका घाइते भएका छन् । यो घटनापछि यहाँ जनताको आक्रोश बढ्यो र जनता सडकमा निस्किए । त्यसपछि निजी विद्यालयका शिक्षक र विद्यार्थी पनि आन्दोलनकारीको समर्थनमा आन्दोलनमा उत्रिएका थिए ।

प्रदर्शनकारीले चालकको शव बोकेर सडकमै बसेर दोषीलाई तत्काल पक्राउ गर्न माग गर्दै आएका थिए ।

प्रदर्शनकारीले यो हत्याको मात्रै होइन बढ्दो आतंकवादी घटनाको पनि विरोध गरिरहेका थिए । बीबीसी उर्दू संवाददाता ओमर दराज नांगियानासँग कुरा गर्दै उनीहरूले भने, ‘यो २०१० साल होइन, जब हामी तिमीलाई देखेर भाग्ने गर्दथ्यौं, हामी आफ्नो सहर, हाम्रो देश र हाम्रो भूमि छोड्ने छैनौं भनेर स्पष्ट गर्न चाहन्छौं।’

वास्तवमा सन् २०१० मा स्वात उपत्यकामा बढ्दो चरमपन्थीका कारण सेनाले कारबाही तीब्र बनाएको थियो र सर्वसाधारणलाई यो क्षेत्र छाड्न भनिएको थियो ।

पश्तून संरक्षण आन्दोलनका प्रमुख मन्जुर पश्तीनले बीबीसीलाई भने, “विगत २० वर्षदेखि हामीले क्रूरता र उत्पीडनको सामना गरेका छौं, पहिले हामी अतिवादका कारण कमजोर थियौं र अहिले सुरक्षाको नाममा सताइँदैछौं।”

“बालबालिका मारिएकामा हामी धेरै दुःखी छौं। हामी कुनै पनि परिस्थितिमा हाम्रो माटोमा आतंकवाद सहन सक्दैनौं,” उनले भने।