काठमाडौं। प्रदेश १ को नामकरण गर्न जारी प्रदेश १ को बैठक दुई घण्टाका लागि स्थगित भएको छ। प्रदेश नामकरणको प्रस्तावमाथि छलफल सकिएपछि नामको विषयमा संशोधन दर्ता गर्न बैठक स्थगित भएको हो।

छलफलमा रहेको प्रदेशको ‘कोसी’ नाममाथिको प्रस्तावमा संशोधन दर्ताका निम्ति सभामुख बाबुराम गौतमले दुई घण्टा समय निर्धारण गरेर बैठक स्थगित गरेका हुन्।

निर्धारित दुई घण्टाको समयभित्र नाममाथि संशोधन परेमा त्यसमाथि पनि आवश्यक छलफल गरेर निर्णय हुने र संशोधन दर्ता नभए सिधै मतविभाजन गर्ने कार्यसूची छ।

प्रदेश सभाले प्रदेशको नामकरण गर्ने तयारी गरेपछि जिल्ला प्रशासन कार्यालय मोरङले प्रदेश सभा आसपासको क्षेत्रमा निषेधाज्ञा जारी गरेको छ।

प्रमुख जिल्ला अधिकारी तीर्थराज भट्टराईले निषेधाज्ञा सम्बन्धी सूचना जारी गर्दै प्रदेशको नामाकरण आजै गर्ने तयारी गरेपछि प्रदेश सभा आसपासको क्षेत्रमा धर्ना, जुलुस तथा प्रदर्शनलाई निषेध गरेको जानकारी दिए।

प्रजिअ भट्टराईले जारी गरेको सूचनामा प्रदेश १ को प्रदेश सभा नामकरणको प्रक्रिया प्रारम्भ भई टुङ्गो नलागेसम्म तथा नामाकरण भएपश्चात् पनि असहमत पक्ष (विभिन्न राजनीतिक दल, समूह, जातीय सङ्घसंस्था) बाट सम्भावित विरोध, धर्ना, जुलुस, झडप हुनसक्ने भएकाले निषेधाज्ञा गरेको उल्लेख छ।