काठमाडौं । राहुल गान्धीले लोकसभाको सदस्यता गुमाएपछि सरकारी बंगला खाली गर्ने नोटिसको जवाफ दिएका छन्। लोकसभा सचिवालयका उपसचिवलाई लेखेको पत्रमा राहुल गान्धीले निर्धारित समयभित्र बंगला खाली गर्ने कुरा गरेका छन् ।

राहुल गान्धीले उक्त पत्रमा लेखेका छन्, ‘विगत चार कार्यकालमा लोकसभाको निर्वाचित सदस्यको हैसियतमा जनताको जनादेशका कारण यहाँ बस्दा मैले सुखद सम्झनाहरू पाएँ। मेरो अधिकारको वकालत नगरी, म तपाईंको पत्रमा दिइएको विवरणहरू पालन गर्नेछु।’

सोमबार नै राहुल गान्धीलाई आफ्नो बंगला खाली गर्न लोकसभा सचिवालयबाट सूचना प्राप्त भएको थियो। केही दिन अघि, सूरत अदालतले मोदी थर मुद्दासँग सम्बन्धित आपराधिक मानहानि मुद्दामा आफ्नो फैसला सुनाएको थियो।

यस निर्णयको एक दिनपछि राहुल गान्धीको लोकसभाबाट सदस्यता खारेज गरिएको थियो। राहुल गान्धीको सदस्यता खारेज गरेपछि कांग्रेसले संसददेखि सडकसम्म प्रदर्शन गर्दै आएको छ ।

कांग्रेस महासचिव नग्माले राहुल गान्धीको पत्र ट्वीट गर्दै लेखेकी छन्, ‘भाजपा र यसका मन्त्रीहरूले राहुल गान्धीको बारेमा झूट फैलाउन बन्द गर्नुपर्छ। राहुल गान्धी जी सधैं सही बाटोमा हिँड्छन् र प्रतिशोधको राजनीति गर्दैनन्।’

चार वर्ष पुरानो आपराधिक मानहानि मुद्दामा दुई वर्षको सजाय पाएको एक दिनपछि कांग्रेस नेता राहुल गान्धीको लोकसभा सदस्यता गत शुक्रबार खारेज गरिएको थियो, लोकसभा सचिवालयले एक अधिसूचना जारी गरेर यो जानकारी दिएको हो।

अधिसूचनामा भनिएको छ कि केरलाको वायनाड लोकसभा सीटका सांसद राहुल गान्धीलाई सजायको दिन अर्थात मार्च २३, २०२३ देखि अयोग्य घोषित गरिएको छ। यो भारतीय संविधान र जनप्रतिनिधित्व अधिनियम, १९५१ को धारा १०२ (१) अन्तर्गत गरिएको छ। सांसद छाडेपछि राहुल गान्धीलाई सरकारी निवास खाली गर्न आदेश दिइएको थियो।