काठमाडौं। नेपाल कम्युनिष्ट पार्टी (एकीकृत समाजवादी) का सम्मानित नेता झलनाथ खनालले मुलुकमा उत्पन्न राजनीतिक संकट समाधानका लागि वाम पार्टीहरूको पुनर्गठन गर्नुपर्ने बताएका छन्। आज यहाँ आयोजित भेलामा उनले पार्टीलाई व्यापक पुनर्गठन गरी संगठनलाई थप सशक्त गर्न आवश्यक रहेको बताए।

पूर्वप्रधानमन्त्री खनालले राजनीतिमा युवालाई अगाडि बढाउन पार्टी नेतृत्व पुस्तान्तरण गर्दै पुराना पुस्ताको नेतृत्वले बिदा लिनुपर्नेमा बताए। वामपन्थी शक्तिले पार्टीभित्रको आफ्ना वैचारिक दृष्टिकोण प्रष्ट गरी आन्तरिक विवाद हल गर्नुपर्ने आवश्यकता औँल्याउँदै उनले त्यसपछि गरिने एकता दीर्घकालीन हुने विचार व्यक्त गरे।

‘मुलुकमा छरिएका कम्युनिष्ट पार्टीमा नेतृत्व हस्तान्तरणको समस्याले कम्युनिष्ट आन्दोलन जुट्ने र फुट्ने प्रक्रियामा छ। वैचारिक दृष्टिकोणसहित नेतृत्व हस्तान्तरण गर्दै पार्टी पुनर्गठनको आवश्यकता छ। त्यसले मात्रै सामाजिक न्याय, आर्थिक रुपान्तरणका कार्यक्रम कार्यान्वयन गर्दै अगाडि बढ्न सकिन्छ’, खनालले भने।

उनले मुलुकमा सुशासन कायम गर्न नेताहरूको सम्पत्ति छानबिन गर्नुपर्नेमा जोड दिँदै निष्पक्ष छानबिन प्रक्रियाबाट दोषी देखिएका नेतालाई पार्टी जिम्मेवारीबाट अलग गरिनुपर्ने धारणा राखे।

पार्टी महासचिव घनश्याम भुसालले कम्युनिष्ट पार्टीमा विकृति र विसंगति फैलिएकाले नेतृत्व हस्तान्तरणको कार्ययोजनासहित वाम एकता गर्नुपर्ने बताए। उनले राजनीतिलाई सही दिशा निर्देश गर्न वामशक्ति एकताबद्ध हुन जरुरी रहेको र पुराना पुस्ताको नेतृत्वले बिदा लिनुपर्ने उल्लेख गरे।