काठमाडौं। गृहमन्त्री सुधन गुरुङले नेपालको विकास प्रयासमा जापान सरकारले उपलब्ध गराएको सहयोगको सराहना गरेका छन्।

मन्त्रालयमा आज नेपालका लागि जापानी राजदूत मायदा तोरुले गरेको शिष्टाचार भेटमा गृहमन्त्रीले नेपालको आर्थिक–सामाजिक विकासमा जापानी सहयोग निरन्तर रहने विश्वास व्यक्त गरे।

गृहमन्त्री गुरुङले निर्माणाधीन नागढुङ्गा सुरुङ मार्ग परियोजनासहित अन्य विभिन्न पूर्वाधार तथा विकास आयोजनाबारे चर्चा गर्दै यस्ता परियोजनाले नेपालको समग्र विकासमा महत्त्वपूर्ण योगदान पु-याइरहेको उल्लेख गरेको गृहमन्त्रीको सचिवालयले जनाएको छ।

नेपाल–जापानबीच विपद् जोखिम न्यूनीकरण तथा प्रतिकार्यमा थप प्राविधिक सहकार्य, क्षमता अभिवृद्धि तथा अनुभव आदानप्रदानसम्बन्धी आवश्यकता औँल्याउँदै गृहमन्त्रीले विपद् व्यस्थापनसम्बन्धी अध्ययन तथा खोज अनुसन्धानका लागि विश्वविद्यालय स्थापनामा प्राविधिक सहयोग गर्न आग्रह गरे।

भेटमा राजदूत मायदाले जापानको आर्थिक, सामाजिक तथा शैक्षिक क्षेत्रमा नेपाली समुदायले प्रभावकारी योगदान पु-याइरहेको बताए। उनले नेपाल–जापान आप्रवासन सहकार्यलाई थप व्यवस्थित र सुदृढ बनाउन जापान सरकार प्रतिबद्ध रहेको बताए।