काठमाडौं। गत साताको अन्तिम कारोबार दिन शुक्रबार (असार ५ गते) को तुलनामा आइतबारनेपाली बजारमा सुन र चाँदी दुवैको मूल्यमा वृद्धि भएको छ। नेपाल सुनचाँदी व्यवसायी महासंघका अनुसार छापावाल सुनको मूल्य प्रतितोला ६०० रुपैयाँले बढेको हो।

यो वृद्धिसँगै आइतबारका लागि सुनको मूल्य प्रतितोला २ लाख ८७ हजार ३०० रुपैयाँ निर्धारण गरिएको छ।

यसअघि गत शुक्रबार सुनको मूल्यमा एकैपटक १० हजार ५०० रुपैयाँको ठूलो गिरावट आउँदा प्रतितोला २ लाख ८६ हजार ७०० रुपैयाँमा झरेको थियो। सोही साताको बुधबार १ हजार २०० रुपैयाँ र बिहीबार १०० रुपैयाँले सुनको मूल्य ओरालो लागेको थियो।

सुनसँगै आइतबार चाँदीको मूल्य पनि प्रतितोला ५० रुपैयाँले बढेर ४ हजार ६९० रुपैयाँ कायम भएको महासङ्घले जनाएको छ। गत शुक्रबार चाँदीको मूल्यमा ३०५ रुपैयाँको गिरावट आउँदा प्रतितोला ४ हजार ६४० रुपैयाँमा सीमित भएको थियो।

त्यसैगरी सो साताको बुधबार १० रुपैयाँ र बिहीबार ३५ रुपैयाँले चाँदीको मूल्य घटेको रेकर्ड थियो। गत साता लगातार ओरालो लागेको सुनचाँदीको मूल्यमा यस साताको पहिलो दिनमै सामान्य सुधार देखिएको हो।