काठमाडौं। स्पेनका मुख्य प्रशिक्षक लुइस डे ला फुएन्टेले फिफा विश्वकप २०२६ को फाइनल खेलमा अर्जेन्टिनाका कप्तान लियोनल मेस्सीलाई रोक्नका लागि कुनै एक खेलाडीलाई मात्र विशेष जिम्मेवारी (म्यान मार्किङ) नदिने स्पष्ट पारेका छन्।

न्युयोर्कस्थित मेटलाइफ स्टेडियममा आइतबार हुने उपाधि भिडन्तअघि आयोजित पत्रकार सम्मेलनमा बोल्दै उनले मेस्सीविरुद्धको एकल मार्किङ रणनीति विगतमा असफल भएको आफ्नै पुरानो अनुभव सुनाए।

प्रशिक्षक डे ला फुएन्टेले वर्षौँअघि कोपा डेल रे प्रतियोगितामा सेभिया र बार्सिलोनाबीचको खेलमा मेस्सीलाई पहिलो पटक युवा अवस्थामा देख्दाको क्षण स्मरण गरे।

त्यतिबेला मेस्सीलाई रोक्न आफ्नो टोलीले विशेष योजना बुन्दै एक खेलाडीलाई म्यान मार्किङमा खटाएको र ७०औँ मिनेटसम्म खेल गोलरहित बराबरीमा राख्न सफल भएको उनले बताए।

तर, मेस्सीलाई रोक्ने खेलाडीले पहेँलो कार्ड पाएपछि उसलाई मैदानबाट परिवर्तन गर्दाको अर्को १५ मिनेटभित्रै मेस्सीले एक्लै चार गोल गरेर खेल उल्ट्याइदिएको रोचक स्मरण उनले साझा गरे।

सोही तितो अनुभवका कारण विश्वकप फाइनल जस्तो ठूलो मञ्चमा मेस्सीमाथि सामूहिक रूपमा विशेष ध्यान दिइने भए पनि एक जना खेलाडीमार्फत मात्र रोक्ने योजना नरहेको उनले प्रस्ट पारे। यसका साथै उनले अर्जेन्टिनी टोली र आफ्ना असल मित्रसमेत रहेका प्रशिक्षक लियोनल स्कालोनीको खुलेर प्रशंसा गरे।

पत्रकार सम्मेलनमा डे ला फुएन्टेले स्पेनका युवा स्टार लामिन यामाललाई मेस्सीसँग तुलना नगर्न आग्रह गर्दै यामाललाई आफ्नै मौलिक शैलीमा विकास हुन दिनुपर्ने धारणा राखे।

मेस्सी फुटबल इतिहासकै अविश्वसनीय प्रतिभा र सबै युवा खेलाडीका लागि प्रेरणाको स्रोत भए पनि लामिनले मैदानमा आफ्नै छुट्टै पहिचान बनाउनुपर्नेमा उनले जोड दिए।

विश्वकप २०२६ मा स्पेन उत्कृष्ट लयमा दौडिरहेको छ। जारी प्रतियोगितामा अहिलेसम्म मात्र एक गोल खाएको स्पेन एउटै विश्वकप संस्करणमा ६ वटा खेलमा ‘क्लिन सिट’ राख्ने पुरुष विश्वकप इतिहासकै पहिलो टोली बनेको छ।

अस्ट्रिया, पोर्चुगल, बेल्जियम र फ्रान्स जस्ता बलिया टोलीहरूलाई पाखा लगाउँदै लगातार ६ खेल जितेर स्पेनले सन् २०१० पछि पहिलो पटक विश्वकपको फाइनल यात्रा तय गरेको हो।

हाल लगातार ३७ खेलसम्म अपराजित रहेको स्पेनले आइतबार अर्जेन्टिनालाई पराजित गर्न सकेमा युरोपेली पुरुष राष्ट्रिय टोलीको इतिहासमै सबैभन्दा लामो अपराजित यात्राको नयाँ कीर्तिमान रच्नेछ।

अर्कातर्फ, साविक विश्वविजेता अर्जेन्टिना पनि लगातार दोस्रो पटक उपाधि चुम्ने ऐतिहासिक दाउमा छ। सेमिफाइनलमा इंग्ल्यान्डलाई २–१ ले हराउँदै फाइनल पुगेको अर्जेन्टिनाले पछिल्ला १४ खेलमा लगातार जित निकाल्दै आफ्नो बलियो उपस्थिति प्रमाणित गरिसकेको छ।

खेलको अन्तिम समय अर्थात् ८५औँ मिनेटपछि मात्रै विपक्षीविरुद्ध आठ गोल गर्दै अर्जेन्टिनाले प्रतियोगितामा अर्को नयाँ कीर्तिमान समेत कायम गरेको छ। दुई टोलीबीचको ऐतिहासिक हेड-टु-हेड भिडन्तको नतिजा हेर्दा दुवैले ६-६ खेल जितेका छन् भने २ खेल बराबरीमा सकिएका छन्।

तथ्यांक र लय दुवै हिसाबले बराबरीमा रहेका युरोपियन च्याम्पियन स्पेन र कोपा अमेरिका विजेता अर्जेन्टिनाबीचको यो महाभिडन्त निकै रोमाञ्चक र कडा प्रतिस्पर्धात्मक हुने अपेक्षा गरिएको छ।