काठमाडौं। नेपाल प्रहरीको नियमित गस्ती टोलीले देशका विभिन्न १० जिल्लाबाट ठूलो परिमाणको अवैध लागुऔषधसहित २५ जनालाई पक्राउ गरेको छ।

केन्द्रीय प्रहरी समाचारकक्षका अनुसार गत शुक्रबार र शनिबार सञ्चालन गरिएको कारबाहीका क्रममा कास्की, मोरङ, सुनसरी, बर्दिया, धनुषा, झापा, ललितपुर, कैलाली, तनहुँ र उदयपुरका विभिन्न स्थानबाट टापेन्टाडोल, ब्राउनसुगर, गाँजा, खैरो हेरोइन, ट्रामाडोल, पोलेन र प्रेगाब्लिनलगायतका लागुऔषध बरामद गरिएको हो।

कारबाहीका क्रममा कास्कीको पोखरा महानगरपालिका-१ सिम्पानी र पोखरा-२५ हेम्जाबाट कुल १ हजार २० ट्याब्लेट टापेन्टाडोलसहित सन्दिप गुरुङ र २१ वर्षीय लुकास तामाङसहित ६ जना पक्राउ परेका छन्।

यस्तै मोरङका सुन्दरहरैँचा, लेटाङ र कानेपोखरीबाट ब्राउनसुगर र गाँजासहित प्रसान्त मगर, निमेस घिमिरे र १८ वर्षीय एक किशोर गरी तीन जना समातिएका छन्।

सुनसरीको इटहरी-१० बाट ५ ग्राम ८५० मिलिग्राम खैरो हेरोइनसहित मोहन गुरुङसहित तीन जना, बर्दियाको बढैयातालबाट ३४९ ग्राम ३६० मिलिग्राम खैरो हेरोइनसहित ५२ वर्षीय दिवे सुनार र धनुषाको विदेहबाट ३९ ग्राम ३६० मिलिग्राम खैरो हेरोइनसहित २८ वर्षीय उमेश मण्डल पक्राउ परेका छन्।

त्यसैगरी झापाको बिर्तामोडबाट ४९० मिलिग्राम ब्राउनसुगरसहित सन्तोष राजवंशी पक्राउ परेका छन् भने ललितपुरका हरिसिद्धी र इमाडोलबाट ट्रामाडोल, पोलेन, टापेन्टाडोल र प्रेगाब्लिनसहित सुरज तामाङ र खगेन्द्रबहादुर राउतसहित तीन जना पक्राउ परेका छन्।

कैलालीको धनगढीबाट १ ग्राम ११३ मिलिग्राम ब्राउनसुगरसहित क्रिस बमसहित चार जना, तनहुँको व्यासबाट १ किलो ५५० ग्राम गाँजासहित मनोज थापासहित दुई जना र उदयपुरको कटारीबाट ६१ ट्याब्लेट टापेन्टाडोलसहित सलम खानसहित दुई जना पक्राउ परेका हुन्। पक्राउ परेका सबैजनामाथि सम्बन्धित प्रहरी कार्यालयहरूबाट थप अनुसन्धान भइरहेको प्रहरीले जनाएको छ।