काठमाडौं । जल तथा मौसम विज्ञान विभाग, मौसम पूर्वानुमान महाशाखाले दोलखाको भीमेश्वर नगरपालिका क्षेत्रमा भारी वर्षाको सम्भावना रहेको जनाउँदै मध्यम प्रभावको चेतावनी (बुलेटिन) जारी गरेको छ।

आज साँझ ६ बजेदेखि भदौ १७ गते साँझ ५ बजेसम्मका लागि जारी गरिएको मौसम पूर्वानुमानअनुसार सो क्षेत्रका धेरै स्थानमा हल्कादेखि मध्यम र थोरै स्थानमा भारी वर्षा हुने सम्भावना रहेको छ।

भारी वर्षाका कारण त्यस क्षेत्रका खोलानाला तथा खहरेहरूमा पानीको बहाव उल्लेख्य बढ्ने, जमिन कटान हुने र पहिरो जान सक्ने जोखिम रहेको महाशाखाले जनाएको छ। जोखिममा रहेका घर, विद्यालय, स्वास्थ्य चौकी र अन्य भौतिक संरचना वरपरको जमिन भासिन सक्ने भएकाले विशेष सतर्कता अपनाउन आग्रह गरिएको छ। साथै, विद्युत्, सञ्चार, खानेपानी र सडक सेवा अवरुद्ध भई सर्वसाधारणको दैनिक जनजीवन र विकास निर्माणका काम प्रभावित हुन सक्ने अनुमान गरिएको छ।

विपत्को जोखिमलाई ध्यानमा राख्दै महाशाखाले स्थानीय प्रशासन तथा सम्बन्धित निकायहरूलाई पूर्वतयारीमा जुट्न निर्देशन दिएको छ। सार्वजनिक सूचना प्रणालीमार्फत नागरिकलाई पूर्वजानकारी गराउन, निर्माण स्थलका उपकरणहरू सुरक्षित स्थानमा सार्न र जोखिमयुक्त क्षेत्रका बासिन्दालाई अस्थायी सुरक्षित स्थानमा स्थानान्तरण गर्न सुझाइएको छ।

महाशाखाले यात्रा गर्नुअघि सडकको अवस्थाबारे जानकारी लिन र जोखिमयुक्त क्षेत्रका विद्यालय वा सेवाहरू अस्थायी रूपमा बन्द गर्नसमेत आग्रह गरेको छ। नागरिकलाई मौसमसम्बन्धी अध्यावधिक जानकारीका लागि विभागको टोल फ्रि नम्बर ११५५ मा सम्पर्क गर्न वा आधिकारिक वेबसाइट र सामाजिक सञ्जालमा हेर्न अनुरोध गरिएको छ।