काठमाडौं । च्याटजीपीटी बनाउने कम्पनी ओपनएआईले मङ्गलबार आफ्नो नयाँ पुस्ताको एआई मोडल ‘जीपीटी-६.१ अस्ट्रा’ लाई हालका लागि सार्वजनिक नगर्ने पुष्टि गरेको छ।

कम्पनीका अनुसार यो मोडल सुरक्षा र विश्वासका आफ्ना तोकिएका मापदण्डहरूमा पूर्ण रूपमा खरो उत्रिन सकेन।

ओपनएआईकी सेफ्टी सिस्टम्स प्रमुख साची जैनले यो एआई मोडलले आफैं इन्टरनेट ब्राउज गर्ने र एप्स प्रयोग गर्नेजस्ता काम गर्न सक्ने भए तापनि यसको कार्यसम्पादन कम्पनीको अपेक्षाअनुसार हुन नसकेको बताइन्।

उनका अनुसार मोडललाई कुन सीमा र कुन अधिकार क्षेत्रभित्र रहेर काम गर्ने भन्ने कुरा बुझ्न गाह्रो परेको देखिएको थियो।

साथै, उसले प्रयोगकर्तालाई आफूले गरेका कामहरूबारे कति सही र पारदर्शी जानकारी दिन्छ भन्ने कुरा पनि स्पष्ट थिएन।

साची जैनले भनिन्, “हामी हाम्रा मोडलहरूको विकास पूर्ण रूपमा सुरक्षित होस् भन्ने चाहन्छौं। तर जब कुनै मोडललाई सर्वसाधारणका लागि सार्वजनिक गरिन्छ, तब सुरक्षा र जिम्मेवार व्यवहारलाई लिएर हाम्रा मापदण्डहरू अत्यन्तै उच्च हुन्छन्।”

हालैका हप्ताहरूमा ओपनएआईका सीईओ स्याम अल्टम्यान र एन्थ्रोपिकका प्रमुख डारियो अमोडेईसहित धेरै एआई दिग्गजहरूले तीव्र गतिमा भइरहेको एआई विकासलाई लिएर चिन्ता व्यक्त गरेका छन् र यस क्षेत्रलाई सतर्कतापूर्वक अघि बढ्न अपिल गरेका छन्।