काठमाडौं । अमेरिकी राष्ट्रपति डोनाल्ड ट्रम्पले फ्लाई दुबईको उडानमा भएको घटनाबारे इजरायली प्रधानमन्त्री बिन्यामिन नेतन्याहुसँग फोनमा कुराकानी गरेका छन्।

बुधबार सञ्चारकर्मीसँग कुरा गर्दै ट्रम्पले नेतन्याहुले उनलाई विमानभित्र भएको घटनाबारे जानकारी गराएको बताएका छन्। उनका अनुसार उडानका क्रममा उत्पन्न परिस्थितिलाई नियन्त्रणमा लिन विमानमा रहेका यात्रुहरूले समेत प्रयास गरेका थिए।

ट्रम्पले घटनालाई ‘अत्यन्तै हैरान पार्ने कहानी’ भन्दै विमानका सह–पाइलट सम्भावित रूपमा आतंकवादी हुन सक्ने वा उनको मानसिक अवस्था ठीक नभएको हुन सक्ने बताएका छन्। यद्यपि, घटनाको वास्तविक कारण र आक्रमणको उद्देश्यबारे अहिलेसम्म कुनै आधिकारिक पुष्टि भएको छैन।

घटनाका क्रममा आक्रमणमा परेका भारतीय पाइलटको ट्रम्पले प्रशंसा गरेका छन्। उनले ती पाइलटलाई ‘हिरो’को संज्ञा दिएका छन्।

घटना बुधबार दुबईबाट तेल अभावतर्फ उडेको फ्लाई दुबईको विमानमा भएको बताइएको छ। उडान भरेको करिब दुई घण्टापछि विमानले आफ्नो निर्धारित मार्ग परिवर्तन गर्दै साउदी अरबतर्फ मोडिएको थियो। त्यसपछि विमान साउदी अरबमा अवतरण गरिएको जनाइएको छ।

विमानको ककपिटमै एक पाइलटले अर्का पाइलटमाथि चक्कु प्रहार गरेको बताइएको छ। आक्रमणमा परेका पाइलट स्मित मच्छर भारतीय नागरिक रहेको जनाइएको छ। घटनापछि उनको अवस्था स्थिर रहेको बताइएको छ।

विमानभित्र पाइलटमाथि आक्रमण हुनुको कारण भने अझै स्पष्ट हुन सकेको छैन। घटनाबारे सम्बन्धित निकायले अनुसन्धान गरिरहेका छन् भने आक्रमणको उद्देश्य र घटनाको विस्तृत कारणबारे आधिकारिक विवरण आउन बाँकी छ।